پشاور(این این آئی)عید الاضحی کے موقع پر شہر میں قربانی کے جانوروں کی بڑے پیمانے پر نقل و حمل سے کانگو وائرس پھیلنے کے خدشات ہیں۔

ماہرین طب کے مطابق کانگو بخار ایک وائرس کے ذریعے پھیلنے والی بیماری ہے جو جانوروں ،اونٹ، گائے، بھیڑ، بکریوں وغیرہ کی جلد پر پائے جانے والے چیچڑوں (ٹس ) پسوکے کاٹنے سے انسانوں میں منتقل ہوتی ہے ایسا جانور نہ خریدا جائے جس کی کھال پر پسو چپکا ہوا ہے، پسو (چیچڑ) جانور کی کھال سے چپک کر جانور کا خون چوستا رہتا ہے جس کی وجہ سے جانور کی کھال سے خون بھی بہنے لگتا ہے۔محکمہ لائیو سٹاک نے بھی لوگوں کو خبردار کردیا ہے انہوں نے کہا کہ عوام اپنی حفاظت کو یقینی بنائیں۔ محکمہ لائیو سٹاک کیجانب سے کانگو وائرس کی روک تھام کے لیے مویشی منڈیوں میں 110 چیک پوسٹیں قائم کرلیں گئیں ہیں۔صوبائی وزیر محب اللہ کا کہنا تھا کہ 620اہلکار ہنگامی بنیادوں پر نہ صرف چیک پوسٹوں پر ڈیوٹی دینگے بلکہ اہلکار مویشی منڈیوں اورباڑوں میں سپرے بھی کرینگے،مہم میں محکمہ امور حیوانات کی 26 موبائل گاڑیاں کام کررہی ہے۔