کابل (آن لائن) ترجمان افغان طالبان سہیل شاہین نے کہا ہے کہ شیرمحمد ایستانکزئی کی سربراہی میں افغان طالبان کا اعلیٰ سطح کا وفد ایران پہنچ گیا ہے جہاں پڑوسی ملک سے اہم امور پر مشاورت جاری ہے ۔ غیر ملکی خبر رساں ادارے کے مطابق اپنے ایک بیان میں انہوں نے کہا کہ

وفد ایران کے دورے پر ہے اور وہ پڑوسی ملک کے متعلقہ حکام سے مشترکہ اہم امور پر ملاقاتیں کر رہا ہے،ترجمان نے بتایا کہ تازہ ترین صورتحال اور مسئلہ کے پرامن حل کیلئے بات کی جائے گی۔دوسری جانب افغان طالبان اور افغان سیاسی رہنمائوں نے ایران کے دارالحکومت تہران میں ایرانی وزیر خارجہ جواد ظریف سے ملاقات کی ہے۔اس موقع پر طالبان اور افغان سیاسی رہنمائوں سے گفتگو کرتے ہوئے ایرانی وزیرِ خارجہ جوادظریف نے کہا کہ افغان رہنما اور افغان عوام افغانستان کے مستقبل کے لیے سنجیدہ فیصلے کریں۔ ایران فریقین کے درمیان مذاکرات عمل میں مدد کے لیے تیار ہے۔افغان طالبان کا یہ بھی کہنا ہے کہ مذاکرات اور سیاسی حل کے لیے پر عزم ہونا افغان رہنمائوں اور سیاسی گروپوں کیلئے بہترین انتخاب ہو گا۔واضح رہے کہ افغان طالبان کے ترجمان کا کہنا ہے کہ ایران نے دو طرفہ مذاکرات کے لیے طالبان وفد کو دورے کی دعوت دی تھی۔