اسلام آباد،لاہور(مانیٹرنگ ڈیسک، اے پی پی، این این آئی )تنخواہ دار طبقے کے الائونسز اور دیگر مراعات پر ٹیکس چھوٹ ختم کر دی گئی ۔ میڈیا رپورٹس کے مطابق آج سے اداروں کی جانب سے تمام فکس ماہانہ ادائیگیوں پر ٹیکس کٹوتی ہو گی۔ دستاویزات کے مطابق چھٹیوں کے بدلے فکسڈ رقم کی وصولی پر ٹیکس لگے گا، اوور ٹائم، بونس ، کمیشن ، فیس اور گریجویٹی

پر بھی ٹیکس کٹوتی ہو گی۔اس کے علاوہ اسپیشل الائونس، خرچہ الائونس، رینٹ ، اسٹے رینٹ اور بلز پر بھی ٹیکس کٹوتی ہو گی۔ انٹرٹینمنٹ الائونس اور پرفارمنس الائونس پر بھی ٹیکس کٹوتی ہو گی۔ دستاویزات میں کہا گیا کہ تنخواہ کے علاوہ جتنی بھی مراعات رقم کی صورت میں ملتی ہیں ، ان ادائیگیوں پر دستیاب ٹیکس چھوٹ ختم کر دی گئی ہے۔ انکم ٹیکس آرڈیننس کی شق 12 میں تبدیلی کر دی گئی۔دستاویزات میں کہا گیا کہ یہ تبدیلی فنانس ایکٹ 2021 کے تحت کی گئی ہے۔دوسری جانب صدر مملکت ڈاکٹر عارف علوی نے فنانس بل 22-2021 پر دستخط کر دیئے۔ایوان صدر کے میڈیا ونگ کے مطابق صدر مملکت نے گزشتہ روز فنانس بل 22-2021 پر دستخط کئے۔ صدر مملکت کی منظوری کے بعد فنانس بل ایکٹ بن گیا ہے۔دریں اثنا لاہور سمیت پنجاب بھر کے سرکاری سکولوں کے گیارہ ہزار ایجوکیٹرز اور اے ای اوز کے کنٹریکٹ میں توسیع نہ ہوسکی، عید پر تنخواہیں جاری نہ ہونے کا خدشہ، پنجاب ٹیچرز یونین

نے ایجوکیٹرز کے کنٹریکٹ میں فوری توسیع کا مطالبہ کردیا۔تفصیلات کے مطابق لاہور میں دوہزار سولہ میں پانچ سالہ کنٹریکٹ پر بھرتی ہونے والے سینئر سکول ایجوکیٹر اور اے ای اوز کے کنٹریکٹ میں توسیع نہیں کی جاسکی۔ پنجاب ٹیچرز یونین کے جنرل سیکرٹری رانا لیاقت علی کا کہنا ہے کہ سیکنڈری سکول ایجوکیٹرز کا پانچ سالہ کنٹریکٹ رواں ماہ اور

اگست میں ختم ہوجائے گا، کچھ کنٹریکٹ اساتذہ کی تنخواہیں بھی رک چکی ہیں۔ان کا مزید کہنا تھا کہ ایجوکیٹرز کے کنٹریکٹ میں فوری توسیع نہ کی گئی تو عید بغیر تنخواہ کے گزرے گی۔ سی ای او ایجوکیشن لاہور فی الفور کنٹریکٹ میں توسیع کے احکامات جاری کریں بصورت دیگر اساتذہ احتجاج کرنے پر مجبور ہوں گے۔