اسلام آباد(مانیٹرنگ ڈیسک، اے پی پی)پاکستان تحریک انصاف کے رہنما فیصل واوڈا نے نجی ٹی وی سے گفتگو میں کہا ہے کہ شاہ محمود قریشی ایک صاف اور شفاف انسان ہیں،جنہوں نے ریمنڈ ڈیوس کے معاملے پر اصولوں کی بنیاد پر استعفیٰ دیا تھا لیکن میں اپنی اس بات پر قائم ہوں کہ اگر مائنس عمران خان کو سوچے گا یا بولے گا تو میں اس کی زبان
کھینچ لوں گا۔عمران خان کے بدھ کو قومی اسمبلی والے خطاب سے ملک کا نام روشن ہوا اور تمام پاکستانیوں کا سر فخر سے بلند ہوا ہے۔انہوں نے کہا کہ سوال یہ ہے کہ اس سے پہلے کوئی کیوں اس طرح کا موقف نہیں لے سکا اس کی وجہ یہ ہے کہ عمران خان کی بیرون ملک جائیدادیں نہیں ۔فیصل واوڈا کا کہنا تھا کہ مسلم لیگ ن کبھی امریکا کے خلاف کسی مشترکہ اعلامیے کا حصہ نہیں بنے گی کیونکہ یہ مغرب کی ناراضگی مول نہیں لے سکتی۔انہوں نے کہا کہ کل کے اہم ترین اجلاس سے بھی اپوزیشن لیڈر غیر حاضر رہے کیونکہ انہیں ملکی مفاد کی باتوں میں دلچسپی نہیں ہے۔دوسری جانب وفاقی وزیر مواصلات و پوسٹل سروسز مراد سعید نے کہا ہے کہ وزیر اعظم کی تقریر نے مخالفین کو بھی تعریف کرنے پر مجبور کردیا ہے، ماسوائے جن کے ناپاک عزائم اور مفادات کو انصاف اور احتساب کی بات سے گزند پہنچ رہی ہے ۔اپنے ایک ٹویٹ میں وفاقی وزیر نے کہا کہ وزیراعظم نے اپنے خطاب میں غریب کے درد، انصاف کے درس، قوم کی خودداری کی پاسداری، اپنے مزدور سے حب سے لے کر کشمیر کے مظلوم تک کی فکر اور اس کے احساس کی بات کی۔وزیراعظم کی تقریر نے مخالفین کو بھی تعریف پر مجبور کردیا ماسوائے جن کے ناپاک عزائم اور مفادات کو انصاف اور احتساب کی بات سے گزند پہنچ رہی ہے
