اسلام آباد(آن لائن)وفاقی دارالحکومت اسلام آباد کے مختلف علاقوں میں گرج چمک کیساتھ تیز بارش اور ژالہ باری جاری ہے۔بارش کے بعد گرمی میں نمایاں کمی آئی ہے اور موسم خوشگوار ہو گیا ہے۔محکمہ موسمیات کے مطابق ہفتہ کے روز بھی خیبرپختونخوا، بالائی اوروسطی پنجاب،گلگت بلتستان اورکشمیر میں آندھی اورگرج چمک کیساتھ

کہیں کہیں پربارش کا امکان ہے۔ تاہم ملک کے دیگرعلاقوں میں موسم گرم جبکہ میدانی علاقوں میں شدید گرم رہیگا۔گذشتہ 24 گھنٹے کا موسم ملک کے بیشترعلاقوں میں موسم گرم اور خشک جبکہ میدانی علاقوں میں شدید گرم رہا۔ تاہم خیبر پختو نخوا،گلگت بلتستان اورکشمیرمیں بعض مقا مات پر تیز ہواوؤں اور گرج چمک کے ساتھ بارش ہوئی۔سب سے زیادہ بارش(ملی میٹر): خیبر پختو نخوا: چیراٹ 04، پٹن 03،لوئردیر 02، گلگت بلتستان: استور، بگروٹ02، کشمیر: گڑھی دوپٹہ میں 03 ملی میٹر بارش ریکارڈ کی گئی۔ گزشتہ روز ریکارڈ کیے گئے زیادہ سے زیادہ درجہ حرارت:سبی47، دادو 45،نوابشاہ 44،بہاولنگر،جیکب آباداور تربت میں 43 ڈگری سینٹی گریڈریکارڈ کیا گیا۔صوبائی دارالحکومت لاہور میں موسم کے لحاظ سے جمعہ ہاٹ فرائیڈے رہا جس کے نتیجے میں شہر کا زیادہ سے زیادہ درجہ حرارت 42 ڈگری سینٹی گریڈ ریکارڈ کیا گیا جبکہ محکمہ موسمیات نے لاہور کے شہریوں کو بہتر موسم کی نوید سناتے ہوئے رات گئے بارشیں برسانے والے سسٹم کا لاہور پہنچنے کی پیش گوئی کردی ہے۔ محکمہ موسمیات کا کہنا ہے کہ لاہور میں باقاعدہ مون سون کا آغاز جولائی کے پہلے ہفتے سے ہوگا۔ تاہم جو حالیہ سپیل لاہور میں داخل ہوا ہے اس سے آندھی کے ساتھ ساتھ بارش کا بھی امکان ہے۔