اسلام آباد (آن لائن) وزیر اعظم عمران خان جمعرات کوکنونشن سینٹر میں وزیراعظم کامیاب جوان پروگرام کا اعلان کریں گے جس میں بیروزگار نوجوانوں کو بااختیار بنانے اور بزنس کے لئے اربوں روپے کے آسان شرائط پرقرضے دیئے جائیں گے۔ اس حوالے سے وزیراعظم کے معاون خصوصی برائے یوتھ عثمان ڈارنے صحافیوں کو بریفنگ دیتے ہوئے بتایا کہ پہلی مرتبہ نوجوانوں کو شفاف طریقہ سے میرٹ پر دس ہزارسے پچاس لاکھ روپے تک کے قرضے دیئے جائیں گے جس میں وزیراعظم سمیت کسی پارلیمنٹیرین یا با اثر فرد کی سفارش نہیں

چلے گی۔ اس مقصد کے لئے نیشنل بینک، بینک آف پنجاب اور بینک آف خیبر کی بالترتیب 600,1600 اور 300 برانچز پہلے فیز میں قرضے کی سہولت دے رہے ہیں اس سکیم سے 18 سال سے لے کر 45 سال تک کے پاکستانی فائدہ اٹھا سکتے ہیں۔ انہوں نے کہا کہ اس سکیم میں نادرا کی مدد سے صرف اہل امیدواروں کو ہی قرضہ دیا جائے گا اور اس میں مارکیٹنگ سسٹم کے تحت امیدوار کی کامیابی کا فیصلہ کیا جائے گا۔ انہوں نے کہا کہ ماضی کی طرح اس سکیم میں بینکوں پر کوئی دباؤ نہیں بلکہ میرٹ پر قرضے دیئے جائیں گے۔