اسلام آباد (این این آئی) پاکستان نے کرتارپور راہداری کی افتتاحی میں تقریب میں سابق بھارتی وزیر اعظم من موہن سنگھ کو مدعو کر نے کا فیصلہ کرلیا ہے۔ پیر کو وزیر خارجہ مخدوم شاہ محمود قریشی نے ویڈیو پیغام میں کہاکہ کرتار پور راہداری ایک اہم منصوبہ ہے اور وزیر اعظم عمران خان کی اس میں ذاتی دلچسپی ہے چنانچہ پاکستان نے مشاورت کے بعد یہ فیصلہ کیا ہے کہ ہم اس کرتارپور راہداری کی افتتاحی تقریب میں ہندوستان کے سابق وزیر اعظم من موہن سنگھ کو اس میں مدعو

کریں گے۔انہوں نے کہاکہ یہ ان کا دھرم بھی ہے وہ سکھ کمیونٹی کی نمائندگی بھی کرتے ہیں۔ انہوکں نے کہاکہ میں بطور وزیر خارجہ پاکستان سردار من موہن سنگھ کو دعوت دیتا ہوں کہ وہ اس افتتاحی تقریب میں تشریف لائیں۔ انہوں نے کہاکہ ہم من موہن سنگھ صاحب کو تحریری طور پر بھی دعوت نامہ بھجوا رہے ہیں۔ انہوں نے کہاکہ ہم سکھ کمیونٹی کو بھی دعوت دیتے ہیں کہ وہ بھی اس تقریب میں شرکت کیلئے تشریف لائیں اور بابا گرو ناننک کے 550 ویں دن کی خوشیوں میں شامل ہوں۔