برسلز(آن لائن)یورپ کے کئی ممالک شدید گرمی کے لپیٹ میں ہے جس کے باعث فرانس، اسپین اور سوئٹزرلینڈ سمیت دیگر ممالک میں درجہ حرارت 41 ڈگری سینٹی گریڈ تک جانے کا امکان ہے۔گزشتہ روز جرمنی، پولینڈ اور جمہوریہ چیک میں جون کے مہینے میں سب سے زیادہ درجہ حرارت ریکارڈ کیا گیا۔ماہرِ موسمیات کا کہنا ہے کہ شمالی افریقہ سے آنے والی گرم ہوا یورپ میں گرمی کا باعث ہیں، انہوں نے خبردار کیا ہے کہ آئندہ 3 روز میں مزید ممالک میں درجہ حرارت میں
اضافے کا امکان ہے۔آج اٹلی کے شہر تورینو میں درجہ حرارت 37، اسپین کے شہر سرقسطہ اور جنوبی فرانس کے علاقے آوینیو میں 39 ڈگری سینٹی گریڈ ریکارڈ کیا گیا۔اسپین کے مشرق اور وسط میں واقع 11 صوبوں میں درجہ حرارت 40 ڈگری سینٹی گریڈ سے تجاوز کرنے کا امکان ہے جبکہ شمال مشرق علاقے میں کل تک درجہ حرارت 45 ڈگری سینٹی گریڈ تک جاسکتا ہے۔دوسری جانب کیٹلونیا میں سیکڑوں فائر فائٹرز شدید گرمی کے باعث جنگلات میں لگی آگ بجھانے میں مصروف ہیں۔مقامی حکومت کی جانب سے اسے 20 سال میں بدترین آگ قرار دیا جارہا ہے جس میں 4 ہزار ہیکڑ (10 ہزار ایکڑ) سے زائد علاقہ متاثر ہوا ہے۔حکام کا کہنا ہے کہ علاقے میں گرمی کی شدت کے باعث آگ 20 ہزار ہیکڑ تک پھیل سکتی ہے، اب تک 20 افراد کو باحفاظت نکال لیا گیا ہے جبکہ متاثرہ علاقے تک جانے والے 5 راستے بند ہیں۔دوسری جانب اٹلی میں بھی درجہ حرارت 40 ڈگری سینٹی گریڈ تک جانے کا امکان ہے بالخصوص وسطی اور شمالی علاقوں میں جبکہ روم سمیت کئی شہروں میں گرمی میں اضافے سے متعلق وارننگ بھی جاری کی گئی ہے۔پیرس میں گرمی کے باعث فوارے لگائے گئے ہیں جبکہ بعض اسکولوں نے امتحانات موخر کردیے اور کچھ اسکول بند ہوگئے ہیں۔فرانس کے شہر تولوز میں درجہ حرارت 41 ڈگری سینٹی گریڈ تک جانے کا امکان ہے جہاں بے گھر افراد کو پانی دینے کے لیے چندہ بھی جمع کیا گیا ہے۔گرمی کے باعث فرانس کی جیلوں میں قید 72 ہزار قیدی بھی متاثر ہورہے ہیں، جن میں سے کچھ نے اپنے سیل کو ’اوون‘ قرار دیا تھا۔گرمی کے باعث جہاں یورپ بھر میں
لوگوں نے ساحل سمندر اور سوئمنگ پولز کا رخ کیا ہے وہیں چڑیا گھر کے مالکان نے جانوروں کو گرمی سے بچانے کے لیے مچھلی، آم اور چیری کے آئس کیک دیے ہیں۔خیال رہے کہ 2003 میں ہیٹ ویو کے باعث 15 ہزار ہلاکتیں ہوئی تھیں اور اب وہاں دوسری بڑی سطح کی وارننگ اورنج الرٹ جاری کی گئی ہے۔دوسری جانب جرمنی میں جون کے مہینے میں تاریخ کا بلند ترین درجہ حرارت ریکارڈ کیا گیا ہے۔میڈیارپورٹس کے مطابق یہ بات جرمنی کے قومی محکمہ موسمیات کی طرف سے بتائی گئی۔ جرمنی میں تاریخ کا یہ بلند ترین درجہ حرات پولینڈ کی سرحد پر واقع جرمن شہر کَوشن میں مقامی وقت کے مطابق دن 2:50 پر ریکارڈ کیا گیا جو 38.6 ڈگری سینٹی گریڈ تھا۔ قبل ازیں بلند ترین درجہ حرارت 27 جون 1947ء کو ملک کے ایک مغربی شہر بیوہلرٹال میں ریکارڈ کیا گیا تھا جو 38.5 ڈگری سینٹی گریڈ تھا۔
