شکارپور(این این آئی)شکارپور کے علاقے ڈکھن میں خاتون کا ایڈز میں مبتلا ہونا جرم بن گیا، خاتون کی ایڈز رپورٹ پازیٹو آنے پر سفاک شخص نے بھائی کے ساتھ مل کر اپنی اہلیہ کو قتل کر کے نعش درخت کے ساتھ لٹکا دی۔بہادر رند نامی شخص نے اپنی اہلیہ کو مبینہ طور پر ایچ آئی وی پازیٹیو آنے پر بھائی کے ساتھ مل کر گلا دبا کر قتل کردیا۔ بعدازاں یہ ظاہر کرنے کے لیے کہ خاتون نے خود کشی کی ہے اسکی لاش درخت کے ساتھ لٹکا دی۔

پولیس نے خاتون کی لاش کو تحویل میں لیکر دیگر لواحقین سے ایچ آئی وی ایڈز کی رپورٹ طلب کرلی ہے۔خاتون کے قتل کا مقدمہ مقتولہ کے بھائیوں کی مدعیت میں درج کرلیا گیاہے۔پولیس نے ایک ملزم گرفتار کرلیا ہے۔ایچ آئی وی ایڈز بالغان سینٹر لاڑکانہ کے انچارج ڈاکٹر نے خاتون میں ایڈز کے وائرس کی تصدیق کی تھی۔انہوں نے ذرائع ابلاغ کے نمائندوں کو بتایا کہ مقتولہ خاتون ٹیسٹ پازیٹو آنے پر 9 مئی کو ان سے دوا لے کر گئی تھی۔