شکارپور(آئی این پی ) صوبہ سندھ کے ضلع شکارپور میں جاکھرانی قبیلے کے دو گروہوں میں تصادم کے بعد مخالفین نے ایمبولینس پر اندھا دھند فائرنگ کر دی جس کے نتیجے میں پانچ افراد جاں بحق جبکہ خاتون سمیت کئی زخمی ہوگئے ہیں، وزیراعلی سندھ مراد علی شاہ نے شکارپور میں ایمبولینس پر فائرنگ کا نوٹس لیتے ہوئے ایس ایس پی شکارپور کو فوری ملزمان گرفتار کرکے رپورٹ پیش کرنے کا حکم دیدیا ۔
تفصیلات کے مطابق شکارپور کے علاقے غلام شاہ تھانے کی حدود میں آج صبح جاکھرانی قبیلے کے دوگروہوں میں تصادم ہوا، جس کے باعث کئی افراد زخمی ہوئے، زخمیوں کو طبی امداد کے لئے اسپتال منتقل کئے جارہا تھا کہ مخالفین نے ایمبولینس پر اندھا دھند فائرنگ کردی، جس کے نتیجے میں پانچ افراد موقع پر ہی جاں بحق جبکہ خاتون سمیت کئی افراد زخمی ہوئے ہیں۔واقعے کے بعد دونوں گروہ مورچہ بند ہوکر ایک دوسرے پر فائرنگ کر تے رہے جبکہ ساری صورت حال میں پولیس غائب ہوگئی ہے، شدید فائرنگ کے باعث علاقے میں سخت خوف وہراس پھیل گیا ہے۔دوسری جانب وزیراعلی سندھ مراد علی شاہ نے شکارپور میں ایمبولینس پر فائرنگ کا نوٹس لیتے ہوئے ایس ایس پی شکارپور کو فوری ملزمان گرفتار کرکے رپورٹ پیش کرنے کا حکم دیا ہے۔وزیراعلی سندھ کی جانب سے جاری بیان میں کہا گیا ہے کہ جس ضلع میں امن وامان خراب ہوگا اس کی انتظامیہ کے خلاف سخت کارروائی ہوگی، صوبے میں جنگل کا قانون نہیں کہ دن دہاڑے کسی کو قتل کردیا جائے۔
