ممبئی(نیوز ڈیسک) بالی ووڈ میں سنجو بابا کے نام سے مشہور اداکار سنجے دت نے سزا پوری ہونے کے بعد پاسپورٹ کی واپسی کے لیے عدالت سے رجوع کرلیا ہے۔بالی ووڈ کے سپر اسٹار سنجے دت کا شمار فلم نگری کے صف اول کے اداکاروں میں ہوتا ہے جبکہ وہ گزشتہ دنوں ساڑھے 3 برس قید کی سزا پوری کرکے پونے کی یارواڈا جیل سے رہا ہوچکے ہیں جس کے بعد وہ جلد ہی ایکشن میں نظرآنے کے لیے بے تاب ہیں تاہم جیل سے سزا پوری کرکے رہائی کے باوجود انہیں پاسپورٹ نہیں دیا گیا۔میڈیا رپورٹس کے مطابق سنجے دت نے سزا پوری ہونے کے بعد پاسپورٹ کی واپسی کے لیے عدالت سے رجوع کرلیا ہے جس کے لیے ان کی جانب سے اسپیشل مجسٹریٹ کی عدالت میں دائر درخواست میں موقف اختیار کیا گیا ہے کہ اپنی قید کی سزا پوری کرکے رہا ہوچکا ہوں جس کے بعد اب بیرون ملک جانا چاہتا ہوں جس کے لیے میرا پاسپورٹ واپس کیا جائے۔واضح رہے کہ اداکار سنجے دت نے 1993 میں ممبئی حملوں اور غیر قانونی اسلحہ رکھنے کے جرم میں ساڑھے 3 سال قید کاٹی ہے۔