ممبئی(نیوز ڈیسک)معروف گلوکار عدنا ن سمیع کی طرف سے بھارتی شہریت کے حصول کیلئے اب تک کی گئی تمام تر کوششوں رائیگاں چلی گئی ہیں۔ قومی اخبارکی رپورٹ کے مطابق گلوکارکے پاکستان کے خلا ف توہین آمیز رویے کے بعد پاکستانی اعلیٰ حکام کی طرف سے انھیں شہرت کی منسوخی کا سرٹیفکیٹ جاری کرنے سے انکار کر دیا گیا ہے۔واضح رہے کسی بھی پاکستانی شہری کی طرف سے کسی دوسرے ملک کی شہریت کے حصول کیلئے مذکورہ سرٹیفکیٹ کا ہونا لازم ہے۔رواں سال اگست کے مہینے میں گلوکا ر کو انسانیت کی بنیاد پر ہندوستان میں غیر معینہ مددت کیلئے بھارتی حکام کی طرف سے قیام کی اجازت دی گئی تھی۔پاکستانی شہریت کو منسوخ کرنے والے محکمے کے افسران کے مطابق گلوکار نے اپنی تمام تر شناختی دستاویزات کو باہر پھینک دیا تھا۔ علاوہ ازیں عدنان سمیع کی طرف سے پاکستان کیلئے انتہائی تحقیر آمیز الفاظ کا استعمال کیا گیا تھا۔پاکستانی حکام کا کہنا ہے کہ جس شخص کی نظر میں ان اہم دستاوزات کی کوئی اہمیت نہیں ہے وہ اسے کیونکر شہریت کی منسوخی کا سرٹیفکیٹ جاری کریں۔گلوکارعدنان سمیع خان کی طرف سے دہلی میں پاکستانی ہائی کمیشن کو پاکستانی پاسپورٹ کے ساتھ ایک خط بھی بھیجا گیا تھا۔ اس خط میں گلوکار کی طرف سے کہا گیا تھا کہ مجھے اب سبز پاسپورٹ کی مزید کوئی ضرورت نہیں ہے مجھے ہندوستان میں اپنا گھر مل چکا ہے۔رپورٹ کے مطابق حکام کی طرف سے کہا گیا ہے کہ گلوکار اب اپنے توہین آمیز رویے کیلئے غیر مشروط معافی نامہ اور ایک مرتبہ پھر درست طریقے سے سرٹیفیکیٹ کے حصول کیلئے کاغذات جمع کرائے۔