اسلا م آباد(مانیٹرنگ ڈیسک)بولی وڈ اداکار سدھارتھ ملہوترا، جنھوں نے حال ہی میں فلم” برادرز” میں اکشے کمار کے بھائی کا کردار ادا کیا ہے، اب “کپور اینڈ سنز” میں فواد خان کے بھائی کے روپ میں نظر آئیں گے.ہندوستانی نیوز ویب سائٹ آئی بی این لائیو کے مطابق سدھارتھ ملہوترا نے “کپور اینڈ سنز” میں اپنے کردار کے حوالے سے بتایا کہ فلم میں وہ اور فواد خان مصنف کا کردار ادا کر رہے ہیں.دہلی سے تعلق رکھنے والے سدھارتھ ملہوترا، فواد خان کے ساتھ پہلی مرتبہ فلم کر رہے ہیں، انھوں نے فلم کی شوٹنگ کے دوران فواد کے ساتھ گزارے گئے وقت کے بارے میں بھی بتایا.”کونور میں فلم کی شوٹنگ کے دوران جب ہمارے پاس کرنے کو کچھ نہیں ہوتا تھا تو میں اور فواد فلموں کے حوالے سے بہت ساری باتیں کرتے تھے، ہم نے کرکٹ بھی کھیلی، فواد خان کے ساتھ کام کرکے مجھے بہت مزا آیا.”سدھارتھ کے مطابق چونکہ فواد کا تعلق لاہور سے ہے اور دہلی اور لاہور ایک جیسے ہیں، تو ہم ثقافتی طور پر ایک دوسرے سے جڑے ہوئے ہیں.بولی وڈ اداکار نے فواد خان کی جانب سے انھیں پاکستان آنے کی دعوت کا ذکر کرتے ہوئے کہا کہ پاکستان جاکر یہ ملک دیکھنا واقعی بہت اچھا تجربہ ہوگا. “دیکھتے ہیں کہ وقت اس بات کی اجازت دیتا ہے یا نہیں لیکن مجھے اپنے آن اسکرین بھائی سے ملنے کے لیے وہاں جانے کی منصوبہ بندی ضرور کرنی چاہیے”.سدھارتھ اپنی فلم کی پاکستان میں ریلیز کے حوالے سے بھی کافی پرجوش ہیں. اس حوالے سے ان کا کہنا تھا، “کپور اینڈ سنز کو پاکستان میں بھی ریلیز ہونا چاہیے، یہ ایک اچھی فیملی کامیڈی اور ڈراما فلم ہے”.فلم “کپور اینڈ سنز” کی کاسٹ میں فواد خان، سدھارتھ ملہوترا، عالیہ بھٹ، رشی کپور، رتنا پھٹک شاہ اور رجت کپور شامل ہیں، دھرما پروڈکشن کی پیش کش اس فلم کی ہدایات شکن بترا نے دی ہیں