ممبئی(نیوز ڈیسک) بالی ووڈ کی پاکستانی نژاد امریکی اداکارہ اور ماڈل نرگس فخری کا کہنا ہے کہ ان کے سابق بوائے فرینڈز اب بھی ان سے محبت کرتے ہیں، یہ دعویٰ انہوں نے کرن جوہر کے پروگرام کافی ود کرن میں کیا۔ نرگس فخری نے امریکا میں ماڈلنگ کیریئر شروع کیا جس کے بعد وہ بھارت منتقل ہو گئیں تا کہ بالی ووڈ میں جگہ بنا سکیں۔ بالی ووڈ میں وہ اب تک تین فلموں میں ہی کام کر پائی ہیں لیکن اپنی پرکشش شخصیت کی وجہ سے خاصی مقبول ہیں۔ ان دنوں وہ ہالی ووڈ فلم سپائی میں کام کر رہی ہیں۔نرگس فخری کرن جوہر کے پروگرام کی مہمان بنیں، ان کےساتھ فلم سلم ڈاگ ملینیئر سے ہالی ووڈ کا حصہ بننے والی فریدہ پنٹو بھی شامل تھیں۔ نرگس فخری نے کہا کہ انہیں اپنی ذات میں حس مزاح سب سے پسند ہے۔ انہوں نے کہا کہ شاید یہ ان کی حس مزاح ہی ہے کہ ان کے سابق بوائے فرینڈز اب بھی ان سے محبت کرتے ہیں۔ انہوں نے کہا کہ وہ دل میں کسی کے لئے نفرت نہیں رکھتیں۔بالی ووڈ میں اپنے کیریئر کے حوالے سے نرگس فخری نے کہا کہ نمبر ون ہیروئن بننا کبھی ان کا مقصد نہیں رہا۔ وہ سال میں ایک آدھ فلم میں ہی کام کرنا چاہتی ہیں اور اگر یہ فلم بھی ہٹ نہیں ہوتی تو انہیں افسوس نہیں ہو گا۔