ممبئی(نیوز ڈیسک) بالی ووڈ اداکار شاہ رخ خان نے کہا ہے کہ رنبیر کپور زبردست اداکار ہے اور اسے اپنی فلمی کیریئر کے حوالے سے کسی مشورے کی ضرورت نہیں ہے۔ رنبیر کپور کی فلم بومبے ویلوٹ بری طرح ناکام ہوئی ہے، اس فلم کی کامیابی کے حوالے سے بہت امیدیں باندھی گئی تھیں لیکن فلم شائقین کو پسند نہ آ سکی۔ رنبیر کپور اس ناکامی کے بعد خاصے پریشان ہیں۔ ایک تقریب کے دوران جب شاہ رخ خان سے اس حوالے سے پوچھا گیا کہ وہ رنبیر کپور کو کیا مشورہ دینا چاہیں گے تو انہوں نے کہا کہ رنبیر کو کسی مشورے کی ضرورت نہیں۔ انہوں نے کہا کہ رنبیرکپور شاندار اداکار ہے اور بہترین اداکار کی بے شک جتنی فلمیں ناکام ہو جائیں، اسے کامیابی ضرور ملتی ہے۔ انہوں نے کہا کہ میں رنبیر کو کوئی مشورہ نہیں دے سکتا، وہ اس خاندان سے تعلق رکھتا ہے جس نے بالی ووڈ میں فلمیں بنانے کا آغاز کیا، اگر اسے مشورہ درکار ہوا تو وہ اپنی فیملی میں بہت سے لوگوں کی طرف دیکھ سکتاہے