لاہور (نیوز ڈیسک) بالی ووڈ اداکارہ ریکھا جنہیں شائقین طویل عرصے بعد فلم ”فتور“ میں دیکھنے کیلئے بیتاب تھے، فلم کی کاسٹ سے علیحدہ ہوگئیں ہیں۔ اداکارہ نے فلم کی شوٹنگ مکمل کروا دی تھی تاہم انہیں ایسا محسوس ہورہا تھا کہ وہ سکرین پر ویسی دکھائی نہیں دے رہیں جیسا کہ انہیں دکھنا چاہئے۔ ڈائریکٹر نے انہیں ری ٹیکس کی پیشکش کی تھی تاہم انہیں ایسا لگا کہ دوبارہ شوٹنگ کا کوئی فائدہ نہیں ہوگا جس پر انہوں نے فلم چھوڑنے کا فیصلہ کرلیا۔ فلم ڈائریکٹر اور پروڈیوسر کا اداکارہ کیخلاف کسی قانونی کاروائی کا امکان نہیں ہے۔ فلم کی پروڈکشن میں شامل عملے نے ریکھا کے فلم چھوڑنے کی تصدیق کی ہے۔اطلاعات کے مطابق اب یہ کردار اداکارہ تبو نبھائیں گی۔ ریکھا کے فلم چھوڑنے سے ادیتیہ رائے کپور اور کترینہ کیف کے لئے مسائل پیدا ہوں گے کیونکہ اب انہیں تبو کے ہمراہ دوبارہ سینز شوٹ کروانا پڑیں گے۔