ممبئی (نیوز ڈیسک)بالی ووڈ ہیرو سلمان خان کے ایکسیڈنٹ کیس میں متعدد پراسرار حقائق سامنے آچکے ہیں لیکن حادثے کے وقت ان کے ساتھ موجود گلوکار کمال خان کی حیرت انگیز گمشدگی ایک ایسا معمہ ہے جو شاید اس کیس کا پراسرار ترین پہلو ہے۔کمال خان کی سابقہ دوست شلپی شرما نے جریدے ”ممبئی مرر“ کو بتایا کہ وہ دونوں ایک فلیٹ میں اکٹھے رہتے تھے اور سلمان خان کے ایکسیڈنٹ کیس میں کمال خان اہم ترین گواہ تھے۔ کمال خان نے اپنے تفصیلی بیان میں پولیس کو بتایا، ”27 ستمبر 2002ءکی رات میں سلمان خان سے ملنے ان کے گھر گیا اور ہم نے رات کا کھانا باہر کھانے کا پروگرام بنایا۔ سلمان، ان کا باڈی گارڈ اور میں ایک لینڈ کروزر میں بیٹھ کر جوہو کے علاقے میں رین ہوٹل گئے۔ رات 11 بجے کے قریب ہم ہوٹل پہنچے۔
وہاں تقریباً ایک گھنٹہ گزارنے کے بعد ہم ایک سفید لینڈ کروزر میں جے ڈبلیو میریٹ ہوٹل گئے اور وہاں کچھ وقت گزارا۔ وہاں سے واپسی پر سلمان ڈرائیونگ سیٹ پر بیٹھے، ان کے ساتھ والی سیٹ پر ان کے باڈی گارد بیٹھے جبکہ میں ڈرائیونگ سیٹ کے پیچھے تھا۔ ہم سینٹ اینڈریوز روڈ سے ہل روڈ کی طرف بڑھ رہے تھے۔ ایک موڑ مڑتے ہوئے سلمان گاڑی کا کنٹرول کھو بیٹھے اور یہ ایک عمارت کے شٹر میں جا گھسی۔ مجھے چیخوں کی آوازیں سنائی دیں اور لوگ گاڑی کے گرد اکٹھے ہوگئے۔ ہجوم چیخ رہا تھا ’سلمان باہر نکلو۔‘
جب ہم نیچے اترے تو لوگوں نے ہمیں دھکے دینے شروع کردئیے۔ سلمان کے باڈی گارڈ نے لوگوں کو بتایا کہ وہ پولیس والے ہیں جس پر ہجوم کچھ ٹھنڈا ہوگیا۔ مَیں سلمان کے گھر گیا اور اس کے چوکیدار کو بتایا کہ وہ سلمان کے بھائی سہیل کو بلائے اور بتائے کہ سلمان کی گاڑی کا ایکسیڈنٹ ہوگیا ہے۔“سلمان خان کے خلاف یہ انتہائی اہم گواہی دینے والے کمال خان کے بارے میں ان کی سابقہ دوست نے بتایا کہ وہ اس کیس کی وجہ سے شدید پریشان رہتے تھے اور اس کا ذکر بھی ہونے پر بگڑ جاتے تھے۔ ان کا کہنا ہے کہ اکثر دونوں میں لڑائی ہوجاتی اور جب 2008ئ میں ایک روز وہ جاگیں تو کمال خان غائب تھے۔ شلپی کا کہنا ہے کہ انہیں کمال کی گمشدگی سے شدید دھچکہ لگا اور وہ کئی ماہ تک اس بات کو قبول نہ کرپائیں۔ ان کا کہنا ہے کہ کمال خان کی گمشدگی دوسروں کی طرح ان کے لئے بھی ایک معمہ ہے اور وہ امید کرتی ہیں کہ وہ کہیں نہ کہیں زندہ اور خوش ہوں گے۔