نئی دہلی(نیوز ڈیسک) بالی ووڈ کی ڈمپل لیڈی پریتی زنٹا کا کہنا ہے کہ انکی زندگی میں کوئی آچکا ہے لیکن ابھی اسکا نام نہیں بتائیں گی۔ ممبئی میں میڈیا سے بات کرتے ہوئے 40 سالہ اداکارہ نے اعتراف کیا کہ آج کل وہ کسی کے دام محبت میں گرفتار ہیں لیکن ابھی وہ اس راز سے پردہ نہیں اٹھائیں گی کہ وہ کون ہے۔ ایک سوال کے جواب میں پریتی نے کہا کہ وہ اب بھی اپنے سابق دوست نیس واڈیا کے ساتھ آئی پی ایل کے حوالے سے رابطے میں ہیں۔ پریتی نے کہا کہ وہ جلد شادی کا ارادہ رکھتی ہیں۔ ان کی یہ بھی خواہش ہے کہ ان کی فیملی بھی ہو اور وہ اپنے بچوں کے ساتھ بھرپور زندگی گزاریں۔ پریتی نے اپنی سدا بہار مسکراہٹ کے ساتھ یہ بھی بتایا کہ شادی کی تو میڈیا کو سب سے پہلے بتائیں گی۔