نیو یارک(نیوز ڈیسک) امریکی خلائی ایجنسی ناسا نے مریخ مشن کے لیے تحقیق کے ایک اہم آلے میں پیدا ہونے والی خرابی کے بعد آئندہ سال مارچ سے شروع ہونے والے اپنے مشن کو معطل کر دیا ہے۔فرانسیسی خبررساں ادارے کے مطابق ناسا نے مریخ مشن کے دوران تحقیق کے ایک اہم آلے میں پیدا ہونے والی خرابی کے بعد آئندہ سال مارچ سے شروع ہونے والے اپنے مشن کو معطل کردیا ہے۔ ناسا کا موقف ہے کہ فرانس کی خلائی ایجنسی کی جانب سے فراہم کیے جانے والے آلے میں خرابی سے مریخ مشن 2 سال کی تاخیر کا شکارہوگیا ہے اوریہ فیصلہ آلے میں پیدا ہونے والی خرابی کو درست کرنے میں ناکامی کے بعد کیا گیا ہے۔خبررساں ادارے اے ایف پی نے ناسا کے جان گرنسفیلڈ کے حوالے سے بتایا ہے کہ مریخ مشن کے بارے میں فیصلہ آئندہ مہینوں کے دوران کیا جائے گا تاہم یہ بات بالکل واضح ہے کہ ناسا مریخ کی سائنسی دریافت اورمعلومات کے حصول کے اپنے عزم پر مکمل طور پر قائم ہے۔واضح رہے کہ ان سائٹ خلائی جہاز کو آئندہ برس چار سے 30 مارچ کے دوران خلا میں جانا تھا جہاں اسے 6 ماہ بعد سرخ سیارے پر اتر کر مریخ کی سطح کا گہرائی سے مطالعہ کرنا تھا۔