لاہور( این این آئی)پاکستان مسلم لیگ (ق) کے سینئر رہنما چودھری شافع حسین نے کہا ہے کہ چودھری شجاعت حسین کی قیادت میں جماعت کو منظم کرنے کا سلسلہ شروع کر دیا ہے ،دیرینہ رہنمائوں اور کارکنوں کو ان کا مقام دیا جائے گا ،آئندہ انتخاب میں ایک نئی اور مضبوط مسلم لیگ میدان میں اترے گی اور اپنا بھر پور سیاسی کردار ادا کریں گے۔
ان خیالات کا اظہار انہوں نے سیاسی وسماجی شخصیت صدر ایگریس ٹائون لاہور حاجی سرفراز احمد وڑائچ سے ملاقات میں گفتگو کرتے ہوئے کیا ۔اس موقع پر حاجی سرفراز احمد وڑائچ نے چودھری وقاص وڑائچ ،چودھری وقار فضل وڑائچ ایڈووکیٹ،سابق صوبائی وزیر بابر سعید وڑائچ،افضل غفاری،ڈاکٹر امتیاز،چودھری ناصر وڑائچ،چودھری عامر سہیل اورمدثر بسرا سمیت سینکڑوں ساتھیوں سمیت چوہدری شجاعت حسین کی سربراہی میں مسلم لیگ (ق) پر بھرپور اعتماد کا اظہار کیا ۔ حاجی سرفراز وڑائچ نے کہا کہ چودھری شافع حسین کو یقین دلاتے ہیں کہ گجرات سے انتخابی میدان میں اترنے پر انہیں بھرپور طریقے سے سپورٹ اور ووٹ دیں گے۔چوہدری شافع حسین نے تقریب سے خطاب کرتے ہوئے حاجی سرفراز وڑائچ اور ان کے ساتھیوں سے اظہار تشکر کرتے ہوئے کہا کہ وہ گجرات سے مسلم لیگ (ق)کی ٹکٹ پر الیکشن میں حصہ لیں گے ۔ پارٹی کو پنجاب میں نئے سرے سے منظم کرنے کا فیصلہ کر کے اس پر کام شروع کر دیا ہے ۔اس حوالے سے صوبہ بھر میں (ق) لیگ کے دیرینہ رہنمائوں اور کارکنوں کی فہرستیں مرتب کی جارہی ہیں۔انہوں نے کہاکہ چودھری پرویز الٰہی اور مونس الٰہی نے جس طرح (ق)لیگ کی ساکھ کو تباہ کیا اس سے ان کی سیاست ختم ہوچکی ہے۔مسلم لیگ (ق)چودھری شجاعت حسین کے نام رجسٹرڈ ہے اور گزشتہ دنوں جو ڈرامہ کیا گیا اس پر قانون اپنا راستہ خود بنائے گا مگر ہم (ق)لیگ کو آگے بڑھائیں گے ۔
