اسلام آباد (این این آئی)ملک میں کورونا وائرس کی بگڑتی صورتحال کے پیش نظر این سی او سی نے بیرون ممالک سے پاکستان آنے والے مسافروں کیلئے ایڈوائزری جاری کردی جبکہ این سی او سی نے وزارت خارجہ، داخلہ، سول ایوی ایشن سمیت تمام صوبائی چیف سیکرٹریزکو مراسلہ ارسال کردیا۔
ایڈوائزری کے مطابق پاکستان آنے والی ایئر ٹریفک 80 فیصد تک کم کرنے کی ہدایت کی گئی ہے۔فضائی سفر محدود رکھنے کی پابندیاں 4 سے20 مئی تک نافذ رہیں گی، 18 مئی کو موجودہ پابندیوں کے پلان کا از سر نو جائزہ لیا جائے گا ، پاکستان آنے والے مسافروں کو 72گھنٹے قبل پی سی آر منفی ٹیسٹ رپورٹ دکھانا لازم ہوگا۔ مسافروں کی پاکستان آمد پر ایئرپورٹ پر دوبارہ پی سی آر ٹیسٹ کیا جائیگا، این ڈی ایم اے تمام انٹرنیشنل ایئرپورٹس پرپی سی آر ٹیسٹ کٹس کی فراہمی یقینی بنانے کی پابند ہوگی،مسافر ٹیسٹ پازیٹو ہونے پر دس دن قرنطینہ کرنے کے پابند ہوں گے۔مثبت رپورٹ پر مسافر کوضلعی انتظامیہ کے زیر انتظام قرنطینہ بھیجا جائیگا، بیرون ملک سے آنیوالے تمام مسافروں کی فاسٹ ٹریک ایپ میں رجسٹریشن لازمی قرار، بیرون ملک سے ملک بدرکئے گئے پاکستانی فاسٹ ٹریک ایپ کی رجسٹریشن سے مستثنیٰ ہوں گے۔این سی او سی نے سول ایوی ایشن، پی آئی اے کو ریوائزڈ ایئر ٹریفک پلان بنانے کی ہدایت کی اور تمام انٹرنیشنل ایئرپورٹس پر محکمہ صحت عملہ کی 24 گھنٹے موجودگی یقینی بنائے جانے کی بھی ہدایت کی۔ایڈوائزری کے مطابق ایوی ایشن ڈویژن،ایئرپورٹ مینجمنٹ مسافروں کی ٹیسٹنگ کیلئے محکمہ صحت کوسہولتیں فراہم کریں گے۔
