اسلام آباد (این این آئی) ایم کیو ایم پاکستان نے وزیراعظم عمران خان کو قومی اسمبلی میں حمایت کا یقین دلاتے ہوئے کہا ہے کہ حکومت کے اتحاد کا حصہ ہیں، ہر صورت ساتھ دینگے۔ تفصیلا ت کے مطابق جمعہ کو وزیراعظم عمران خان سے ایم کیو ایم پاکستان کے وفد نے کنونیئر خالد مقبول صدیقی کی قیادت میں ملاقات کی ۔ذرائع کے

مطابق ایم کیو ایم وفد نے وزیراعظم کو قومی اسمبلی میں حمایت کا یقین دلا تے ہوئے کہا کہ حکومت کے اتحاد کا حصہ ہیں ہر صورت ساتھ دیں، ہمارے تمام اراکین قومی اسمبلی آپ کو اعتماد کا ووٹ دیں گے۔ایم کیو ایم وفد نے کہا کہ موجودہ گورننس نظام پر تحفظات ہیں، اس کے باوجود عمران خان کے ساتھ ہیں ۔وفد نے یہ کہا کہ ایم کیو ایم کو یقین ہے عمران خان نہ خود کرپشن کرتے ہیں نہ اسے پسند کرتے ہیں۔انہوں نے کہا کہ نظام میں تبدیلی چاہتے ہیں تاکہ عوام کو ڈیلیور کرسکیں، ہماری کوئی ڈیمانڈ نہیں، کراچی اور سندھ میں مشاورت میں شامل کیا جائے۔اس موقع پر وزیراعظم عمران خان نے حمایت کی یقین دہانی پر ایم کیو ایم وفد سے اظہار تشکر کیا ہے۔وزیراعظم نے ایم کیو ایم وفد کی تجاویز کو سراہا اور اتحادی جماعت کو سندھ کے امور میں مشاورت کی یقین دہانی کرائی ۔ایم کیو ایم وفد نے وزیراعظم کو بتایا کہ 18ویں ترمیم کے بعد اختیارات کا مسئلہ ہے،بلدیاتی نظام میں اختیارات کی نچلی سطح تک منتقلی چاہتے ہیں۔ وزیراعظم نے کہاکہ میرا مقصد اقتدار نہیں، عوام کی فلاح ہے، شفاف نظام کی تبدیلی کیلئے کوشش کر رہا ہوں، اداروں میں شفافیت یقینی بنانے کیلئے جدوجہد جاری رہے گی۔وزیراعظم نے کہا کہ اتحادیوں سے تمام وعدے پورے کریں گے۔حکمران اتحاد میں شامل جماعت پاکستان مسلم لیگ (ق) نے وزیراعظم عمران

خان کو اعتماد کا ووٹ دینے کی یقین دہانی کروادی ہے۔اس حوالے سے وزیر اعظم عمران خان سے مسلم لیگ (ق) کے وفد نے جمعہ کو ملاقات کی۔ذرائع کے مطابق مسلم لیگ (ق) نے وزیر اعظم کو یقین دہانی کروائی ہے کہ ہم آپ کے بااعتماد اتحادی ہیں۔ذرائع کے مطابق یقین دہانی پر وزیراعظم نے مسلم لیگ (ق) کے وفد سے اظہار تشکر کرتے ہوئے کہا کہ چودھری برادران کیلئے دل میں بہت احترام ہے۔

موضوعات:اعتماد کا ووٹ