جڑانوالہ (آن لائن ) سابق وفاقی وزیر مملکت طلال چودھری نے کہا ہے کہ حمزہ شہباز کی رہائی نے ثابت کر دیا کہ مسلم لیگ ن کی قیادت ایماندار اور وطن سے محبت کرنے والوں کی جماعت ہے حمزہ شہباز شریف کی رہائی عوامی دعائوں کا نتیجہ ہے مسلم لیگ ن کو عوام کے دلوں سے نہیں نکالا جا سکتا۔ حمزہ شہباز شریف پر کوئی
کرپشن ثابت نہ ہوپانا حکمرانوں کے منہ پر طمانچہ ہے ۔ تحریک انصاف انتقام کی آگ میں ملک و قوم دونوں کو جھونک رہے ہیں۔ پی ڈی ایم کا مشترکہ سینیٹر منتخب ہوتے ہی ان کی آگ بجھ جائے گی اور یہ اس کی راکھ سے اندھے ہو جائیں گے۔ ان خیالات کااظہارسابق وفاقی وزیر مملکت طلال چودھری نے مسلم لیگ ن کے رہنمائوں شیخ ابو بکر کی رہائش گاہ پر لیگی کارکنان سعید انور بھولا، حاجی عطاء ملک ، رانا اشتیاق و دیگران سے گفتگو میں کہا کہ موجودہ حکومت کی تمام ناقص پالیسیوں نے عوام کو فاقہ کشی کی زندگی گزارنے پر مجبور کردیا ہے ۔ غریب آدمی دو وقت کی نوالے تک کو ترس گیا، نوکریاں ، گھر بانٹنے والے عوام سے روزگار بھی چھین رہے ہیں۔حکومتی بد نیتی اور گردشی قرضوں نے جعلی تبدیلی لانے والوں کا پول کھول دیا، گھریلو و صنعتی صارفین کو گیس کی فراہمی کو یقینی بنایا جائے،اس وقت جس مہنگائی کا سامنا عوام کوہے ملک کی تاریخ میں اتنی مہنگائی دیکھنے اور سننے میں نہیں آئی مہنگائی کے اس دور میں جہاں غریب و متوسط طبقہ کے عوام کیلئے گھر چلانا اور بیوی بچوں کی بنیادی ضروریات پوری کرنا مشکل ہے۔ سینیٹ کے الیکشن میں ن لیگ بھار ی اکثریت سے کامیابی حاصل کرے گی۔ حالیہ ضمنی الیکشن میں عوام نے ثابت کر دیا ہے کہ ن لیگ کی قیادت ہی ملک کو بحرانوں سے نکالنے کی صلاحیت رکھتی ہے۔
