لاہور( این این آئی )پاکستان کے سابق صدر جنرل ضیا الحق کی32ویں برسی آج ( پیر)17اگست کو منائی جائے گی۔ جنرل ضیا ء الحق پاکستان کے طویل ترین عرصہ تک حکمران رہے وہ17 اگست1988 کو بہاولپور کے قریب ایک فضائی حادثے میں جاں بحق ہو گئے تھے

انہیں اسلام آباد کی فیصل مسجد میں سپردخاک کیا گیا تھا ۔پاکستان کے سابق فوجی حکمران جنرل ضیا الحق 12اگست 1924 کوبھارت کے شہر جالندھر میں پیدا ہوئے انہوں نے5 جولائی1977ء میںذوالفقار علی بھٹو کا تختہ الٹ کر ملک میں مارشل لا نافذ کردیااور ملک کے حکمران بنے وہ 11برس تک ملک کے بیک وقت صدر اور فوجی سربراہ رہے۔جنرل ضیا الحق17اگست1988  کو جنوبی پنجاب کے شہر بہاولپور کے نزدیک علاقہ لال کمال میں C130طیارے کے حادثے میں جاں بحق ہوئے اس حادثے میںان کے ساتھ پاکستان میں اس وقت کے امریکی سفیر آرنلڈ رافیل ، امریکی ملٹری کمانڈر جنرل واسم ،چیئرمین جوائنٹ چیفس آف سٹاف کمیٹی جنرل اختر عبدالرحمن سمیت پاک فوج کے اعلی افسران بھی جاں بحق ہو ئے تھے۔