اسلام آباد ( اے پی پی) پاکستان اکانومی واچ کے چیئرمین برگیڈیئر (ر) محمد اسلم خان نے کہا ہے کہ بھارت افغانستان کے دریائوں کو پاکستان کے خلاف بطور ہتھیار استعمال کررہا ہے جس کا نوٹس لے کر فوری اقدامات کرنے کی ضرورت ہے ، بھارت افغانستان میں بارہ ڈیم بنارہا ہے جن کی تعمیر سے پاکستان کو ملنے والے پانی میں کمی واقع ہو جائے گی ۔ان خیالات کا اظہار انھوں نے ایک بیان میں کیا۔انہوں نے کہا کہ بھارت آبی دہشت گردی سمیت ہر ممکن طریقے سے

پاکستان کو عدم استحکام کا شکار کرنا چاہتا ہے جس کے لیے وہ اربوں ڈالر خرچ کر رہاہے۔ان کا کہنا تھا کہ پاکستان کو دریائے کابل کے زریعے سالانہ پچیس ملین ایکڑ فٹ پانی ملتا ہے تاہم بھارت کی خواہش ہے کہ اس میں ہر ممکن حد تک کمی کی جائے جس کے لئے وہ افغانستان کی واٹر پالیسی پر اثر انداز ہورہاہے ۔ پاکستان اور افغانستان کے درمیان پانی کی تقسیم کا کوئی معاہدہ نہیں جس سے فائدہ اٹھاتے ہوئے بھارت  پاکستانی زمینوں کو بنجر اور عوام کو پیاسا مارنا چاہتا ہے۔

موضوعات:پاکستان اکانومی واچ