لاہور30 جولائی (نیوزڈیسک)وزیراعلیٰ پنجاب سردار عثمان بزدارنے آج پنجاب ہاؤس اسلام آباد کے احاطے میں پام کا پودا لگا کر موسمی شجرکاری کا افتتاح کیا۔وزیراعلیٰ نے پودا لگانے کے بعد شجرکاری مہم کی کامیابی کیلئے دعا کی۔ وزیراعلیٰ عثمان بزدار نے اس موقع پر گفتگو کرتے ہوئے کہا کہ پاکستان کو غیر موافق موسمی تغیرات کے اثرات سے محفوظ رکھنے کیلئے شجرکاری ناگزیر ہے۔ درخت ہماری نئی نسل کے دوست ہیں، بچوں کو درختوں اور پودوں سے پیار کی ترغیب دی جائے۔ انہوں نے کہا کہ
رواں مون سون شجرکاری مہم کے دوران صوبہ بھر میں کروڑوں پودے لگانے کا ہدف پورا کیا جائے گا۔ کلین اینڈ گرین پروگرام موسمی تبدیلیوں کی وجہ سے درپیش چیلنج سے نمٹنے میں معاون ثابت ہوگا۔ شہروں کو سرسبز و شاداب اور آب و ہوا کو سازگار بنانے کیلئے شجرکاری مہم پر پیش رفت کی خود نگرانی کر رہا ہوں۔ انہوں نے کہا کہ شجرکاری مہم کی کامیابی کیلئے ہر سطح پر شہریوں کی شرکت یقینی بنائی جائے۔ جنگلات کے رقبے میں اضافہ کرکے ماحولیاتی آلودگی پر قابو پایا جاسکتا ہے اور کرہ ارض کے بڑھتے ہوئے درجہ حرارت کی وجہ سے موسمی تغیرات کو شجرکاری کے ذریعے ہی روکا جاسکتا ہے۔مون سون کی حالیہ بارشیں شجرکاری کیلئے انتہائی موزوں ہیں، ان کا بھرپور فائدہ اٹھایا جائے اور صوبہ بھر میں ہر سرکاری و نجی محکمہ بڑھ چڑھ کر پودے لگائے اور سوشل فاریسٹری کے فروغ کیلئے بچوں، خواتین، بزرگوں اور نوجوانو ں کو ماحول دوست سرگرمیوں میں شریک کیا جائے۔ انہوں نے کہا کہ سکولوں، کالجوں اور یونیورسٹیوں میں پودے لگانے پر طلبا و طالبات کی حوصلہ افزائی کی جائے گی۔ مستقبل میں آبی قلت کے سنگین بحران کے سدباب کیلئے ہنگامی بنیادوں پر شجرکاری ضرور ی ہے۔ محکمہ جنگلات گھروں میں شجرکاری کیلئے شہریوں کو پودے فراہم کرے گا۔ وزیراعلیٰ نے کہا کہ پنجاب میں ہاؤسنگ سوسائٹیوں میں شجرکاری کو لازم قرار دیا گیا ہے تاکہ تعمیرات کی وجہ سے ماحولیاتی حدت پر قابو پایا جاسکے۔ صوبائی وزیر کھیل و سیاحت تیمور خان بھٹی، صوبائی وزیر ایکسائز اینڈ ٹیکسیشن حافظ ممتاز احمد، ایڈیشنل چیف سیکرٹری پنجاب اور متعلقہ حکام بھی اس موقع پر موجود تھے۔
