لاہور(این این آئی) تعلیمی اداروں، ہسپتالوں اور فلاحی اداروں کے لئے بھی بجلی مہنگی کر دی گئی، مذہبی سمیت تمام سرکاری اداروں اور پانی کے ٹیوب ویلز کیلئے بھی بجلی کی فی یونٹ قیمت بڑھا دی گئی ہے۔ نجی ٹی وی کے مطابق حکومت کی جانب سے مذکورہ اداروں اور محکموں کے لئے اے تھری کے نام سے نیا ٹیرف متعارف کروا دیا گیا ہے۔ واضح رہے کہ اس سے قبل تمام تعلیمی اداروں اور ہسپتالوں کے لیے گھریلو ٹیرف پر بلنگ کی
جا رہی تھی۔اداروں اور محکموں کیلئے ٹیکس کے علاوہ بجلی کی فی یونٹ قیمت 19.40روپے مقرر کی گئی ہے،اس سے قبل مذکورہ اداروں کو رعایتی نرخوں پر 14.38روپے فی یونٹ پر بجلی مہیا کی جارہی تھی۔رواں سال سے اضافی ٹیرف کیساتھ بجلی کی قیمت وصول کرنے کی ہدایات جاری کر دی گئی ہیں۔ لیسکوہیڈ کوارٹرز کی طرف سے تعلیمی اداروں، ہسپتالوں اور ڈسپنسریز کا ریکارڈ مرتب کرنے کی ہدایت کر دی گئی ہے۔
