واشنگٹن(آن لائن)وزیراعظم عمران خان دورہ امریکا مکمل کر کے واپس روانہ ہو گئے ہیں۔عمران خان آج رات کو پاکستان پہنچیں گے۔بلاشبہ وزیراعظم عمران خان کا یہ تاریخی اور کامیاب دورہ تھا۔وزیر اعظم عمران خان کو امریکہ میں ایک اور اعزاز حاصل ہوا ہے۔میڈیا رپورٹس میں بتایا گیا ہے کہ امریکی ایوانِ نمائندگان میں عمران خان کے اعزاز میں قرارداد منظور کی گئی اور

یہ قرارداد وزیراعظم عمران خان کو بطور تحفہ پیش بھی کی گئی۔وزیراعظم عمران خان کو یہ قرارداد اسپیکر نینسی پلوسی نے پیش کی۔قرارداد میں وزیراعظم عمران خان کو خراج تحسین پیش کیا گیا اور پاک امریکا تعلقات میں بہتری کے لیے ان کے کردار کو بھی سراہا گیا۔خیال رہے وزیراعظم عمران خان اپنے کامیاب دورہ امریکہ کے بعد آج رات وطن واپس پہنچیں گے۔اس حوالے سے مائیکروبلاگنگ ویب سائٹ ٹویٹر پر اپنے پیغام میں وزیراعظم عمران خان کے قریبی ساتھی اور پاکستان تحریک انصاف کے سینئیر کارکن جہانگیر ترین نے ان کے پْر تپاک استقبال کا اعلان کر دیا۔اپنے ٹویٹر پیغام میں جہانگیر ترین کا کہنا تھا کہ وزیراعظم عمران خان آج رات ڈیڑھ بجے اسلام آباد پہنچیں گے جہاں ان کا پْرتپاک استقبال کیا جائے گا۔ انہوں نے کہا کہ وزیراعظم عمران خان کے کامیاب دورہ امریکہ کی وجہ سے عالمی سطح پرپاکستان کا تشخص بہتر ہوا۔ انہوں نے کہا کہ آئیں سب مل کر وطن واپسی پر وزیراعظم عمران خان کا آج رات ڈیڑھ بجے نیو اسلام آباد ائیرپورٹ پر بھرپور استقبال کریں۔اس کے ساتھ ہی جہانگیر ترین نے اپنے ٹویٹر پیغام میں WelcomeHomePMIK# کا ہیش ٹیگ بھی استعمال کیا۔واضح رہے امریکا میں وزیراعظم عمران خان کو جو عزت دی گئی وہ ماضی میں کسی حکمران کو نہیں دی گئی۔بلاشبہ کہا جا سکتا ہے کہ یہ عمران خان کا امریکا کا ایک کامیاب دورہ تھا جس میں امریکا اور پاکستان کے مابین کئی غلط فہمیاں بھی دور ہوئیں۔