لاہور(این این آئی)مسلم لیگ (ن) پنجاب کی سیکرٹری اطلاعات عظمیٰ بخاری نے کہا ہے کہ نالائق حکمرانوں کی نا اہلی کا خمیازہ ہر طبقہ بھگت رہا ہے۔مسلم لیگ (ن) ابھی تاجروں کی حمایت میں سڑکوں پرنہیں آئی حکومت نے پہلے ہی گھبرانا شروع کردیا۔انہوں نے وزیر اطلاعات
صمصام بخاری کے بیان پر اپنے رد عمل میں کہا کہ پارلیمنٹ اور سرکاری ٹی وی پر حملہ (ن) لیگ نہیں تحریک انصاف نے کیا۔پاکستان میں جلاؤ گھیراؤ اور پکڑ دھکڑ کی سیاست عمران نیازی اینڈ کمپنی نے شروع کی۔اسلام آباد کے لاک ڈاؤن کے خواب دیکھنے والے نے آج پورا ملک لاک ڈاؤن کرالیا۔عمران نیازی نے پہلے دن ہی خود کو متنازعہ بنالیا تھا۔چور دروازے سے اقتدار تک پہنچنے والے کبھی عوامی مسائل سے آشنا نہیں ہو سکتے۔انہوں نے کہا کہ نیازی صاحب اداروں کو سیاسی مخالفین کیخلاف استعمال کرنے سے نا اہلی نہیں چھپ سکتی۔جج ارشد ملک سے پہلے زبردستی پریس ریلیز جاری کرائی پھر زبردستی بیان حلفی دلایا۔سلیکٹڈ حکومت اور نالائق اعظم کا مکرو چہرہ پوری قوم کے سامنے آچکا ہے۔نواز شریف کی سیاست ختم کرنے والے آج نواز شریف کی منتیں کررہے ہیں۔مریم نواز نے ابھی پہلی ویڈیو جاری کی اور ووٹ چور حکومت پر سکتہ طاری ہو گیا۔پوری حکومت کی توجہ اس وقت مریم نواز کی نقل و حرکت پر ہے۔نواز شریف کی مخالفت میں نالائقوں کے ٹولے نے ملکی سلامتی اور اداروں کا وقار داؤ پر لگادیا ہے۔
