لاہو ر(این این آئی) موٹاپے کا شکار صادق آباد کا رہائشی نورالحسن انتقال کرگیا جب کہ کچھ دن پہلے لاہور میں نور الحسن کا آپریشن بھی کیا گیا تھا۔نجی ٹی وی کے مطابق موٹاپے کا شکار صادق آباد کا رہائشی نورالحسن انتقال کرگیا، نورالحسن کے لواحقین نے بھی موت کی تصدیق کر دی جب کہ ان کی میت کو آبائی شہر صادق آباد لے جایا جائے گا، نورالحسن کو کچھ روزقبل علاج کے لیے لاہور کے نجی ہسپتال میں لایا گیا تھا جہاں ان کا آپریشن کیا گیا تھا۔ترجمان شالامار ہسپتال کے مطابق نورالحسن کی موت ہارٹ اٹیک سے ہوئی، ہارٹ اٹیک سانس بند
ہونے سے ہوا جب کہ لواحقین نے الزام لگاتے ہوئے کہا کہ نورالحسن کی موت طبی امداد بند ہونے سے ہوئی جب کہ موت کی وجہ سے تحریری طور پر آگاہ کیا جائے۔اہلیہ نورالحسن کا کہنا ہے کہ ہم صبح ناشتہ کرنے باہر آئے واپس آئے تو ہمیں بتایا گیا کہ نورالحسن انتقال کرگئے ہیں، جب تک ہم بیٹھے رہے وہ ٹھیک تھے، ہمیں طبیعت کی خرابی کا نہیں بتایا گیا بس اچانک موت کی اطلاع دی گئی، علاج تو ٹھیک ہورہا تھا لیکن اچانک پتہ نہیں کیا ہوا جب کہ ہمیں کسی نے موت کی وجہ کے بارے میں بھی کچھ نہیں بتایا صرف ڈیڈ باڈی حوالے کی گئی ہے۔
