لاہور(این این آئی)پاکستان مسلم لیگ (ن) کی مرکزی نائب صدر مریم نواز ریلی کی صورت میں جاتی امراء رائے ونڈ سے منڈی بہاؤ الدین کیلئے روانہ ہوئیں،جاتی امراء جمع ہونے والے کارکن وزیر اعظم نواز شریف، تیری آواز میری آواز مریم نواز مریم نواز کے نعرے لگاتے رہے،سکیورٹی نے مریم نواز کی گاڑی کو اپنے حصار میں لئے رکھا۔ تفصیلات کے مطابق مریم نواز اپنے اعلان کے مطابق سہ پہرکے وقت منڈی بہاؤ الدین میں اعلان کردہ جلسے سے خطاب کے لئے جاتی امراء رائے ونڈ سے روانہ ہوئیں۔ ان کے شوہر کیپٹن (ر) محمد صفدر
نے گاڑی ڈائیور کی۔ گھر سے روانگی کے وقت کارکن والہانہ انداز میں نعرے لگاتے رہے اور اسی دوران ایک کارکن کا پاؤں گاڑی کے نیچے آگیا جس سے وہ زخمی ہوگیا، کارکنوں کے شور پر مریم نواز نے گاڑی کے اندر سے پریشانی کا اظہار کرتے ہوئے اس بارے استفسار کیا۔ اس موقع پر سکیورٹی کے بھی انتہائی سخت انتظامات کئے گئے تھے جبکہ سکیورٹی نے مریم نواز کی گاڑی کو اپنے حصار میں لئے رکھا۔ مریم نواز کی ریلی کی صورت میں روانگی کی وجہ سے مختلف شاہراہوں پر ٹریفک سست روی کا شکار رہی۔
