لیڈز (نیوز ڈیسک) پاکستان کے افغانستان کے ساتھ میچ کے دوران جہاز کے ذریعے پاکستان مخالف نعروں کی تشہیر کی گئی، یاد رہے کہ ہفتے والے دن پاکستان اور افغانستان کے میچ کے دوران جہاز کے ذریعے اشتہارات گرائے گئے، ان اشتہارات پر گمشدہ افراد اور بلوچستان کے حوالے سے پیغام درج تھے۔
ان میں ایک اشتہار میں ”پاکستان میں گمشدگیوں کے خاتمے میں مدد کی جائے“ درج تھا جبکہ دوسرے پر ”بلوچستان کے لیے انصاف“ درج تھا۔یہ پیغام انگریزی میں درج تھے، واضح رہے کہ یہ اشتہار صرف جہاز کے ذریعے نہیں گرائے گئے بلکہ گراؤنڈ کے باہر بھی ہورڈنگز پر عمران خان کی تصویروں کے ساتھ یہ پیغامات آویزاں کیے گئے تھے، اس حوالے سے آئی سی سی نے جہاز سے پاکستان کے خلاف نعروں پر مبنی اشتہارات پر نوٹس لیتے ہوئے کہا ہے کہ ہم کرکٹ ورلڈ کپ کے دوران کسی بھی سیاسی نوعیت کے پیغام کی حمایت نہیں کرتے اور ہم پولیس کے ساتھ مل کر یہ پتہ لگائیں گے کہ یہ کیسے ہوا اور آئندہ ایسا نہ ہو۔ائیر ٹریفک کا ریکارڈ رکھنے والی ویب سائٹ فلائیٹ ریڈار کا کہناہے کہ ہفتے کو استعمال ہونے والا جہاز ایک نجی کمرشل کمپنی ائیر ایڈز کا تھا،میڈیا ذرائع کے مطابق بلوچ ریپبلکن پارٹی اور ورلڈ بلوچ آرگنائزیشن اس مہم کے پیچھے ہیں، بلوچ ریپبلکن پارٹی اور ورلڈ بلوچ آرگنائزیشن کی طرف سے جاری کی گئی پریس ریلیز کے مطابق گرائے گئے وہ بینر ورلڈ بلوچ آرگنائزیشن اور بلوچ ریپبلکن پارٹی کی مشترکہ انسانی حقوق پر آگاہی مہم کا حصہ تھے۔یاد رہے کہ بلوچ ریپبلکن پارٹی کے صدر براہمداغ بگٹی ہیں جو کئی سالوں سے سوئٹزر لینڈ میں رہائش پذیر ہیں۔ براہمداغ بگٹی نواب اکبربگٹی کے پوتے ہیں۔ نواب اکبر بگٹی کی وفات کے بعد جمہوری وطن پارٹی دو حصوں میں تقسیم ہو گئی تھی، نئے حصے کا نام بلوچ ریپبلکن پارٹی رکھا گیا۔
