مانسہرہ (نیوز ڈیسک) مسلم لیگ (ن) کے رہنما کیپٹن (ر) محمد صفدر نے کہا ہے کہ ایون فیلڈ ریفرنس کا جو بھی فیصلہ آئے پاکستان کے باشعور عوام پہلے کی طرح اس فیصلے کو بھی مسترد کر دیں گے،مسلم لیگ (ن) ووٹ اور عدلیہ کے تقدس کی بحالی ،مشرف کو عدالت کے کٹہرے میں لانے کا مشن جاری رکھے گی۔۔جمعرات کو مانسہرہ میں انتخابی جلسے سے خطاب کرتے ہوئے مسلم لیگ (ن) کے رہنماء کیپٹن (ر) محمد صفدر نے کہا کہ میاں نواز شریف اور ان کا خاندان قیدوبند کی
صعوبتوں سے گھبرانے والا نہیں ہے۔انہوں نے کہا کہ مسلم لیگ (ن) کیخلاف جو کچھ ہو رہا ہے عوام اس سے اچھی طرح باخبر ہیں ۔ انہوں نے کہا کہ میاں محمد نواز شریف اور مریم نواز ضرور واپس آئینگے۔انہوں نے کہا کہ ایون فیلڈ ریفرنس کا جو بھی فیصلہ آئے پاکستان کے باشعور عوام پہلے کی طرح اس فیصلے کو بھی مسترد کر دیں گے۔انہوں نے کہا کہ مسلم لیگ (ن) ووٹ اور عدلیہ کے تقدس کی بحالی اور مشرف کو عدالت کے کٹہرے میں لانے کا مشن جاری رکھے گی۔
