اسلام آباد(مانیٹرنگ ڈیسک) فوجیوں کی لاشیں مسخ کرنے کاواویلا، سابق صدر جنرل جنرل (ر)پرویز مشرف نے بھارتی میڈیا کے چودہ طبق روشن کر دئیے، بھارتی پروپیگنـڈے کو جھوٹا اور بے بنیاد قرار دے دیا۔ تفصیلات کے مطابق پاکستان کے سابق صدر جنرل (ر)پرویز مشرف نے فوجیوں کی لاشیں مسخ کرنے کا واویلا کرنے پر بھارتی میڈیا کے چودہ طبق روشن کر دیئے۔
بھارتی نجی ٹی وی سے گفتگو کے دوران پرویز مشرف کا کہنا تھا کہ بھارتی فوجیوں کی لاشیں مسخ کرنے کا واویلا بالکل جھوٹا اور بے بنیاد ہے ، پاکستان کی فوج ایک ڈسپلن فوج ہے جہاں ہر چیز کنٹرول میں ہے۔ انہوں نے ایک سوال کا جواب دیتے ہوئے کہا کہ اس قسم کے بھارتی پروپیگنـڈے صرف پاکستان اور اس کی آرمی کو بدنام کرنے کیلئے کئے جاتے ہیں۔ نجی ٹی وی کے اینکر نے جب پرویز مشرف سے کارگل کی جنگ میں ایک بھارتی فوجی سورو کالیا کی لاش کو مسخ کرنے کا ذکر کرتے ہوئے کہا کہ اس وقت آپ پاک فوج کے سربراہ تھے ۔اس پر سابق آرمی چیف نے بھارتی اینکر کو کرارا جواب دیتے ہوئے کہا کہ کارگل جنگ میں سوروو کالیا کی لاش کی بے حرمتی کا واقعہ جھوٹ پر مبنی تھا ۔ یہ اس وقت بھی جھوٹ تھا اور آج جو کہا جا رہا ہے وہ بھی جھوٹ ہے۔پرویز مشرف نے بھارتی اینکر اور بھارتی آرمی کو مخاطب کرتے ہوئے کہا کہ اس طرح کی باتیں بھارت پاکستان کو بدنام کرنے کیلئے پھیلاتا ہے جو کہ نہیں ہونی چاہئیں۔ان کا کہنا تھا کہ کارگل جنگ میں سوروو کالیا کی لاش کی آنکھیں نکالنے سے متعلق بھارت کا اس وقت کا پروپیگنڈہ جھوٹ پر مبنی ہے۔پاکستان کی فوج ایک پروفیشنل اور ڈسپلنڈ فوج ہے یہ کوئی قبائلی فوج نہیں۔ ان کا کہنا تھا کہ نہ ہمارا مذہب اور نہ ہی ہمارا کردار ہمیں اس بات کی اجازت دیتا ہے کہ مرے ہوئے شخص کی لاش کا مثلہ کریں ۔ ایسا بھارتی فوج تو کر سکتی ہے پاکستانی فوج ایسا کرنے سے متعلق سوچ بھی نہیں سکتی۔
