کراچی(مانیٹرنگ ڈیسک) پاکستان کے معروف متنازعہ میزبان اور اداکار وقار ذکاء نے کراچی ایئر پورٹ میں اسلحے کے ساتھ داخل ہونے کا دعویٰ کر دیا۔ تفصیلات کے مطابق وقار ذکاء نے سوشل میڈیا پر جاری ایک وڈیو میں کہا ہے کہ میں اور میرا ایک دوست جس کے پاس اس کا لائسنس یافتہ اسلحہ موجود ہے وہ اسلحے سمیت کراچی ایئر پورٹ میں داخل ہو گئے ہیں اور اس موقع پر انہیں کسی نے چیک نہیں کیا بلکہ سیکورٹی حکام نے انہیں تلاشی لئے بغیر کلیئر کر دیا ہے جو کہ سیکورٹی حکام کی سنگین نا اہلی ہے۔
ماضی میں کراچی ایئر پورٹ پر ہونے والے حملے کے باوجود سیکورٹی حکام کی کارکردگی کا یہ عالم ہے کہ کوئی بھی اسلحہ لیکر کراچی ایئر پورٹ میں داخل ہو سکتا ہے اور اس طرح کوئی بھی تخریبی کارروائی دیکھنے میں آ سکتی ہے۔ وقار ذکاء نے کہا کہ ہمارا مقصد کسی کی بے عزتی کرنا نہیں بلکہ یہ احساس دلوانا ہے کہ کوئی بھی بڑا نقصان سیکورٹی نہ ہونے کی وجہ سے ہو سکتا ہے۔