لاہور ( این این آئی) لاہور ہائی کورٹ نے پاناما لیکس کے انکشافات پر وزیر اعظم کے خلاف کارروائی کے لئے تمام درخواستوں کو یکجا کرنے کا حکم دیدیا ۔گزشتہ روز لاہور ہائی کورٹ کے جسٹس شاہد وحید نے کیس کی سماعت کی ۔تحریک انصاف کے گوہرنوازسندھو سمیت دیگر شہریوں نے درخواستیں دائرکررکھی تھیں جن میں مبینہ طور پر وزیراعظم اورکالا دھن رکھنے والے دیگرسیاستدانوں کے خلاف کارروائی کی استدعا کی گئی ہے۔تحریک انصاف کے رہنما گوہر نواز سندھو کی درخواست پر سماعت شروع ہوئی تو عدالت کو بتایا گیا کہ اسی نوعیت کی مزید درخواستیں دائر کی گئی ہیں جس پر جسٹس شاہد وحید نے پاناما لیکس کے انکشافات کے بارے میں تمام درخواستوں کو یکجا کرنے کا حکم دیا اور ہدایت کی کہ تمام درخواستوں پر 11اپریل کو سماعت کی جائے گی ۔ درخواست میں تحریک انصاف کے رہنما گوہر نواز سندھو نے یہ موقف اختیار کیا کہ پاناما لیکس سے یہ بات ثابت ہو گئی ہے کہ وزیر اعظم اور خاندان کے افراد نے غیر قانونی طور پر سرمایہ بیرون ملک منتقل کیا ہے اس لیے نیب کو وزیر اعظم اور ان کے خاندان کے ارکان کے خلاف کارروائی کا حکم دیا جائے ۔