لاہور( نیوزڈیسک) این اے 122سے مسلم لیگ (ن) کے امیدوار سردار ایاز صادق نے کہا ہے کہ 11اکتوبر کو عوام اپنے ووٹ کی طاقت سے ناچنے والی سونامی کو مسترد کر دیں گے ،سمجھ سے بالا تر ہے کہ عمران خان کو لاہور کی ترقی کیوں ہضم نہیں ہوتی ،پیسے کے بل بوتے پر عوام کے ضمیر خریدنے والے ناکام رہےں گے ۔ان خیالات کا اظہار انہوں نے حلقہ این اے 122کی انتخابی مہم کے سلسلہ میں مختلف مقامات پر خطاب کرتے ہوئے کیا ۔ اس موقع پر پی پی 147سے امیدوار محسن لطیف ، مہر اشتیاق سمیت دیگر بھی موجود تھے ۔سردار ایاز صادق نے کہا کہ عمران خان بتائیں انہوں نے عوام کو سوائے مایوسی کے اور کیا دیا ہے ، نیا پاکستان بنانے کے دعوے کئے گئے لیکن خیبر پختوانخواہ کی حالت زار سب کے سامنے ہے جہاں حالات پہلے سے بھی ابتر ہو گئے ہیں۔ انہوں نے کہا کہ عوام کارکردگی کی بنیاد پر ووٹ دیتے ہیں اور مسلم لیگ (ن) اسی بناءپر تیسری مرتبہ حکومت میں آئی ہے ۔ انہوں نے کہا کہ عمران خان کو لاہور کی ترقی ہضم نہیں ہوتی ۔ اگر انہیں لاہور میں ہونے والے ترقیاتی کام پسند نہیں تو وہ لاہور نہ آیا کریں۔ مسلم لیگ (ن) کی حکومت نے عوام کو میٹرو بس کا کامیاب منصوبہ دیا ، اب عوام کی نظر یں اورنج لائن ٹرین منصوبے پر مرکوز ہیں ۔