وفاقی دارالحکومت کی پولیس نے 23 مارچ کو ہونے والی یوم پاکستان پریڈ پر دہشت گردی کے بڑے منصوبے کو ناکام بنانے کا دعویٰ کیا ہے۔  پولیس کا کہنا ہے کہ گزشتہ ماہ 19 فروری کو امام بارگاہ قصر سکینہ میں ہونے والے ناکام خود کش حملے کے بعد پولیس کی جانب سے اسی روز غوری ٹاون کا سرچ آپریشن کیا گیا جس کے دوران بڑی تعداد میں اسلحہ برآمد ہوا تھا جب کہ دو دہشت گردوں کو بھی حراست میں لیا گیا۔ پولیس کے مطابق حراست میں لیے گئے دہشت گردوں نے دوران تفتیش 23 مارچ کو اسلام آباد میں یوم پاکستان کی پریڈ میں دہشت گردی کے منصوبے کا انکشاف کیا ہے۔ یاد رہے کہ حکومت نے 23 مارچ کو یوم پاکستان کے موقع پرافواج کی مشترکہ پریڈ کے انعقاد کا اعلان کیا ہے۔ یہ پریڈ گزشتہ سات برس سے سیکیورٹی وجوہات کی بنا پر منعقد نہیں کی جا رہی تھی۔ فوجی پریڈ کا فیصلہ اس وقت سامنے آیا جب دسمبر میں دہشت گردوں نے پشاور میں آرمی پبلک اسکول پر حملہ کرکے 132 بچوں سے زائد سمیت 150 سے زائد افراد کو ہلاک کردیا تھا۔