اسلام آباد(نیوزڈیسک)وفاقی وزیر خزانہ اسحاق ڈار نے کہا ہے کہ پٹرولیم مصنوعات کی قیمتوں کو مارچ میں تبدیل نہیں کیاجا ئےگا،پٹرولیم مصنوعات کی فروری والی قیمتیں مارچ میں بھی برقرار رہیں گی۔ اسحاق ڈار نے ان خبروں کی تردید کی کہ پٹرولیم مصنوعات کی قیمتوں میں اضافہ کیا جارہا۔اسحاق ڈار کا مزید کہنا ہے کہ اوگرانے پٹرول کی قیمت میں5روپے59پیسے،مٹی کے تیل کی قیمت میں 7روپے 32پیسے اضافے جبکہ ڈیزل کی قیمت میں5روپے49 پیسے کم کرنےکی سفارش کی تھی تاہم وزیراعظم کی خواہش پر عوام کو خوش خبری سنا رہے ہیں کہ حکومت نے پیٹرولیم کی قیمتوں میں اضافہ نہ کرنے کا فیصلہ کیا ہے جس کے بعد پیٹرولیم مصنوعات کی قیمتیں آئندہ ماہ کے لیے برقرار ر ہیں گے۔اسحاق ڈار نے کہا کہ ڈیزل پر سیلز ٹیکس 27 سے بڑھا کر تقریباً 36 فیصد کیا جارہا ہے جب کہ دیگر پیٹرولیم مصنوعات پر سیلز ٹیکس 27 سے کم کرکے 18 فیصد تک کیا جائے گا جب کہ پٹرولیم کی قیمتوں میں کمی سے 68 ارب روپے کم محصولات ہوئے۔ انہوں نے کہا کہ ملک میں توانائی، معیشت اور دیگر شعبوں کی حالت بہتری کی طرف جارہی ہے، تین سال پہلے فنانشل ٹاسک فورس نے پاکستانی معیشت کو گرے قرار دیا تھا تاہم اب اس کی جانب سے ملکی معیشت کو بہتر جانتے ہوئے اسے وائٹ لسٹ قرار دیا جارہا ہے۔واضح رہے کہ اوگرا کی جانب سے حکومت کو پیٹرولیم مصنوعات کی قیمتوں میں 12 روپے تک اضافے کی سفارش کی گئی تھی جسے وزیراعظم کی جانب سے مسترد کردیا ۔