یروآن(این این آئی ) نگورنو کاراباخ کے دوسرے بڑے شہر شوشا میں 28 سال بعد اللہ کی کبریائی کی صدائیں بلند ہو گئیں،غیرملکی خبررساں ادارے کے مطابق فوجی جوان کی اذان کی آوازشہر کی فضاوں میں گونجنے لگی جس کی ویڈیو سوشل میڈیا

پر زیرگردش ہے۔نگورنو کاراباخ میں جنگ بندی کی نگرانی کا مشترکہ مرکز بنانے کے معاہدے پر روس و ترکی کے دستخط کے بعد متنازع ریجن میں آرمینیا اور آذر بائیجان کے درمیان گزشتہ دنوں جنگ بندی ہوئی ہے۔دوسری جانب ترک صدر رجب طیب اردوان نے کہا کہ ترکی اور روس نے نگورنو کاراباخ میں جنگ بندی کی نگرانی کی کوششوں کو مربوط کرنے کیلئے ایک مشترکہ مرکز کے قیام کے معاہدے پر دستخط کیے ہیں۔واضح رہے کہ نگورنو کاراباخ کو بین الاقوامی طور پر آزربائیجان کا حصہ تسلیم کیا جاتا ہے لیکن سنہ 1994 میں دونوں ممالک کے درمیان جنگ ختم ہونے کے بعد سے اس کا حکومتی انتظام آرمینیائی نسل کے لوگوں کے پاس تھا۔عالمی سطح پر نگورنو کاراباخ آذربائیجان کا تسلیم شدہ علاقہ ہے تاہم اس پر آرمینیا کے قبائلی گروہ نے فوج کے ذریعے قبضہ کررکھا تھا جبکہ اسی قبضے کے باعث پاکستان آرمینیا کو تسلیم نہ کرنے والا واحد ملک ہے۔