روم (نیوز ڈیسک)اٹلی میں ایک ہی روز میں کورونا وائرس سے 475 افراد ہلاک ہوگئے جوکہ اب تک کسی بھی ملک میں کورونا سے ایک ہی روز میں سب سے زیادہ ہلاکت ہے۔
میڈیا رپورٹس کے مطابق اٹلی میں کورونا سے ہلاکتوں کی تعداد 2978 ہوگئی ہے، اٹلی میں کورونا کے 4207 نئے کیسز ریکارڈ ہوئے جس کے بعد اٹلی میں کورونا سے متاثرہ افراد کی تعداد 35 ہزار 713 تک پہنچ گئی۔ اطالوی حکام نے عوام سے پرسکون رہنے کی اپیل کی۔مہلک کورونا وائرس چین کے علاوہ دنیا بھر میں تیزی سے پھیل رہا اور اب تک 170 ممالک میں پنجے گاڑ چکا ہے۔چین سمیت دنیا بھر میں کورونا وائرس کے مریضوں کی تعداد 2 لاکھ 6 ہزار 900 ہوگئی ہے جبکہ مجموعی ہلاکتیں 8 ہزار سے تجاوز کرچکی ہیں۔ واضح رہے کہ اٹلی کا شمار ان ممالک میں ہوتا ہے جہاں کورونا وائرس نے بڑے پیمانے پر تباہی مچائی ہو۔ میڈیا ذرائع کے مطابق کرونا وائرس سے ہلاک ہونے والوں کو اٹلی میں دوسری جگہ منتقل کرنے کے لئے فوج کی خدمات حاصل کر لی گئی ہیں اور فوجی ٹرکوں کے ذریعے لاشوں کو منتقل کیا جا رہا ہے
