کرائسٹ چرچ (این این آئی)نیوزی لینڈ کے شہر کرائسٹ کرچ کی مسجد النور پر ہونے والے حملے کو ایک سال مکمل ہونے پر جمعہ کا اجتماع ہارن کیسل ایرینا میں منعقد کیا گیا جس میں نیوزی لینڈ کی وزیر اعظم جسینڈا آرڈرن نے خصوصی طورپر شرکت اور مسلم خواتین سے ملاقات کی، اس موقع پر سکیورٹی کے خصوصی انتظامات کئے گئے ، ہیلی کاپٹر کے ذریعے علاقے کی فضائی نگرانی کی جاتی رہی ۔
تفصیلات کے مطابق نیوزی لینڈ کے شہر کرائسٹ کرچ کی مسجد النور پر ہونے والے حملے کو ایک سال مکمل ہونے پر جمعہ کا اجتماع ہارن کیسل ایرینا میں منعقد کیا گیا جس میں نیوزی لینڈ کی وزیراعظم نے خصوصی طورپر شرکت کی اس موقع پرایرینا کو دو حصوں میں تقسیم کیا گیا تھا اور سکیورٹی کے سخت انتظامات کئے گئے تھے اور تمام نمازیوں کو تلاشی کے بعد اندر جانے کی اجازت دی گئی ،پولیس کے مسلح دستوں نے سٹیڈیم کو چاروں طرف سے گھیرے میں لئے رکھا اور ہیلی کاپٹر کے ذریعے اردگرد کے علاقوں کی بھی فضائی نگرانی کی جاتی رہی ۔جمعہ کے اجتماع کو دیکھنے کیلئے نیوزی لینڈ کی وزیر اعظم جسینڈا آرڈرن نے بھی ایرینا میں موجود رہیں اور اس موقع پر وزیراعظم نے مسلمان خواتین سے ملاقات بھی کی۔
