صنعاء (این این آئی)عرب اتحاد نے یمن میں گرفتار کیے گئے حوثی ملیشیا کے دو سو قیدیوں کو رہا کردیا ہے۔میڈیارپورٹس کے مطابق عرب اتحاد کے ترجمان کرنل ترکی المالکی نے ایک بیان میں ان قیدیوں کی رہائی کی اطلاع دی اور کہا کہ عالمی ادارہ صحت کے تعاون سے یمن کے

دارالحکومت صنعاء سے مریضوں کو دوسرے ممالک میں منتقل کرنے کے لیے پروازیں چلائی جائیں گی اور وہاں وہ اپنا علاج کراسکیں گے۔انھوں نے کہا کہ عرب اتحاد کی قیادت اسٹاک ہوم میں گذشتہ سال دسمبر میں طے شدہ سمجھوتے کے تحت یمن میں جاری بحران کے حل کے لیے کوششوں کی حمایت جاری رکھے گی۔وہ قیدیوں کے تبادلے کے لیے سمجھوتے کی بھی حمایت کررہی ہے اور وہ اختلافات کے خاتمے کے لیے بھی سازگار ماحول فراہم کررہی ہے۔اسٹاک ہوم سمجھوتے میں یمن کے ساحلی شہر الحدیدہ سے طرفین کے فوجیوں کے انخلا پراور وہاں غیرجانبدار مبصرین کی تعیناتی پر زوردیا گیا تھا تاکہ الحدیدہ کی بندرگاہ پربیرون ملک سے درآمدہ غذائی اجناس کو بلا روک ٹوک اتارا جاسکے اورانھیں وہاں سے ملک کے دوسرے علاقوں میں منتقل کیا جاسکے۔کرنل ترکی المالکی کا کہنا تھا کہ قیدیوں کا تبادلہ ایک انسانی معاملہ ہے۔عرب اتحاد نے یمن میں انسانی صورت حال بالخصوص یمنی عوام کی صحت کو بہتر بنانے کے لیے اپنی کوششیں جاری رکھی ہوئی ہیں اور اس ضمن میں متعلقہ بین الاقوامی قوانین اور سمجھوتوں کی پاسداری کی جا رہی ہے۔

موضوعات:عرب اتحاد،کرنل ترکی المالکی،یمن،حوثی باغی،اسٹاک ہوم سمجھوتا،صنعاء