صنعاء (این این آئی)یمن کی عالمی سطح پر تسلیم شدہ حکومت کے سربراہ معین عبدالملک نے ملک میں آئینی حکومت کی عمل داری کی بحالی اور ایرانی حمایت یافتہ حوثی ملیشیا کے خلاف سعودی عرب کی قیادت میں قائم عرب اتحاد کی کوششوں کا خیر مقدم کیا ہے۔ سعودی عرب کی قیادت نے یمن میں امن واستحکام کی بحالی کے لیے ناقابل فراموش خدمات انجام دی ہیں۔ یمن کو باغیوں سے آزاد کرانے کا بڑا بوجھ سعودی عرب نے اٹھایا ہے۔عرب ٹی وی کے مطابق یمن میں برطانوی سفیر مائیکل آرون سیملاقات کے دوران معین عبدالملک نے کہا کہ ہماری فیصلہ کن لڑائی ایرانی پروگرام کے خلاف ہے۔

یمن میں ایرانی حمایت یافتہ حوثی باغیوں کو ملک پرقبضے کی ہرگز اجازت نہیں دیں گے۔ ایرانی توسیع پسندانہ پروگرام کو یمن میں دفن کردیں گے۔یمن کے عبوری دارالحکومت عدن میں چند روز قبل ہونیوالے فسادات پرافسوس کا اظہار کرتے ہوئے وزیراعظم نے امن وامان کی بحالی میں سعودی عرب کے کردار کو سراہا۔انہوں نے کہا کہ سعودی عرب نے عدن میں حکومت اورعلاحدگی پسند عبوری کونسل کے درمیان پیدا ہونے والے تنازع کو خوش اسلوبی سے ختم کرکے یمن کو ایک اور بڑی تباہی سے بچالیا۔ معین عبدالملک نے ایرانی حمایت یافتہ حوثی ملیشیا پر ملک میں فرقہ واریت پھیلانے کا الزام عاید کیا۔

موضوعات:یمن،حوثی ملیشیا،معین عبدالملک،سعودی عرب،ایران