پیونگ یانگ (آن لائن)شمالی کوریا نے مختصر فاصلے تک مار کرنے والے متعدد میزائلوں کا کامیاب تجربہ کیا ہے‘ترجمان وائٹ ہائوس نے کہا ہے کہ شمالی کوریا کے اقدام سے آگاہ ہیں ،اہم مانیٹرنگ کو جاری رکھا جائیگا۔
برطانوی نشریاتی ادارے کے مطابق شمالی کوریا کی جانب سے مختصر فاصلے تک مار کرنے والے کئی میزائلوں کا تجربہ کیا گیا ہے۔جنوبی کوریا کے جوائنٹ چیفس آف اسٹاف نے ہفتہ کو جاری ایک بیان میں کہا کہ میزائل تجربے شمالی کوریا کے مشرقی حصے سے کیے گئے ہیں۔رپورٹس کے مطابق میزائل تجربے کی تصدیق ہونے کی صورت میں پیونگ یانگ کی جانب سے نومبر 2017 میں بین البراعظمی بیلسٹک میزائل کے تجرجے کے بعد یہ پہلا میزائل تجربہ ہوگا۔ویتنام سمٹ میں شمالی کوریا کے سربراہ کم جونگ اور امریکی صدر ٹرمپ کی بلا نتیجہ ملاقات کے بعد یہ پہلا میزائل تجربہ ہے۔برطانوی نشریاتی ادارے کا کہنا ہے کہ شارٹ رینج میزائل کا تجربہ شمالی کوریا کے بڑے اور ایٹمی میزائلوں کے تجربے نہ کرنے کے وعدوں کی خلاف ورزی نہیں کرے گا۔برطانوی میڈیا کے مطابق میزائلوں کو جاپان کے ساحل میں داغا گیا جس نے 70 سے 200 کلو میٹر کے درمیان پرواز کی۔دوسری جانب وائٹ ہاؤس کے ترجمان کا کہنا ہیکہ شمالی کوریا کے اس اقدام سے آگاہ ہے اور اس طرح کی اہم مانیٹرنگ کو جاری رکھا جائیگا۔
