نئی دہلی(این این آئی) سری لنکا میں ہونیوالے خوفناک دھماکوں کے بعد بھارت کے دارالحکومت دہلی کے ریلوے اسٹیشن سمیت دیگر کئی ریلوے اسٹیشنوں کو بم سے اڑانے کی دھمکی ملنے کے بعد پولیس کو الرٹ کردیا گیا۔بھارتی میڈیا رپورٹس کے مطابق دھمکی میں کہا گیا کہ 13 مئی کو دھماکے کیے جائیں گے اور ایسا نہ ہوسکنے پر 16 مئی کو کاشی وشوناتھ مندر اور دہلی میں موجود اہم مندروں کو اڑایا جائے گا۔بھارتی میڈیا کے مطابق دھمکی ایک خط کے ذریعے دی گئی ہے جو محکمہ ڈاک کے ذریعے شاملی ریلوے اسٹیشن ماسٹر کو بھیجا گیا۔ میڈیا کے
مطابق خط ہندی میں ہاتھ سے تحریر کیا گیا۔ڈی جی پولیس او پی سنگھ کے حوالے سے خط کی تحقیقات اے ٹی ایس کے حوالے کردی گئی، جب کہ محکمہ پولیس کو الرٹ کردیا گیا۔ بھارتی ریلوے اسٹیشنوں کو ملنے والی دھمکی ایک ایسے وقت میں دی گئی جب پورے ملک میں لوک سبھا کے انتخابات ہورہے ہیں۔ ان انتخابات کے تین مراحل مکمل ہوچکے ہیں،یاد رہے کہ سری لنکا میں اتوار کے دن ایسٹر کے موقع پر ایک ساتھ کئی گرجا گھروں کو بم دھماکوں کا نشانہ بنایا گیا جس کے نتیجے میں 321 افراد اب تک ہلاک ہوچکے ہیں اور سینکڑوں زخمی ہیں۔
