پیرس(این این آئی)فرانسیسی حکومت نے انکشاف کیا ہے کہ قطر کی جانب سے اخوان المسلمون کے بانی حسن البنا کے پوتے پروفیسر طارق رمضان کو ماہانہ خطیر رقم فراہم کی جاتی ہے جس کی مدد سے وہ سوئٹزرلینڈ اور دوسرے ملکوں میں اخوان کے منصوبوں کو آگے بڑھا رہے ہیں۔

عرب ٹی وی کے مطابق فرانسیسی حکومت کی مانیٹرنگ کمیٹی کی طرف سے جاری کردہ رپورٹ کی تفصیلات میں بتایاگیاکہ فرانسیسی وزارت اقتصادیات ومالیات کے زیر انتظام یہ ایجنسی منی لانڈرنگ اوردہشت گردی کے لیے کی جانے والی فنڈنگ کے حوالے سے تفصیلات شائع کرتی ہے۔رپورٹ میں بتایا گیا کہ خواتین کو جنسی طور پر ہراساں کرنے کے الزامات کا سامنا کرنے والے طارق رمضان قطری حکومت کے لیے مشیر کی خدمات بھی انجام دیتے ہیں۔ یہی وجہ ہے کہ قطر فاؤنڈیشن انہیں ہر ماہ خطیر رقم فراہم کرتی ہے۔ قطر فاؤنڈیشن نے طارق رمضان کو دوحہ لانے اور ان سے استفادہ کرنے کی سہولت مہیا کی اور ان کی خدمات کے حصول میں اخوان کے روحانی پیشوا یوسف القرضاوی نے بھی مدد فراہم کی۔فرانسیسی تحقیقات کے مطابق طارق رمضان کو یکم جون 2017ء کو قطر کی طرف سے پانچ لاکھ 90 ہزار ڈالر منتقل کیے گئے۔ اس رقم سے 28 جولائی 2017ء کو انہوں نے پیرس کے شمال میں دو منزلہ فلیٹ خرید کیا۔ اس کے علاوہ دیگر رقم طارق رمضان کی دو تنظیموں کے مقاصد کے لیے استعمال کی گئی۔