لندن (این این آئی)عالمی جریدے نے رواں سال بھی دنیا کے مہنگے اور سستے ترین شہروں کی فہرست جاری کردی۔برطانوی مالی جریدے دی اکانامسٹ کے اکنامکسٹ انٹیلی جنس یونٹ کی جانب سے جاری کی گئی دنیا کے مہنگے اور سستے ترین شہروں کی فہرست کے مطابق گزشتہ 30 سال میں پہلی بار دنیا کے تین شہر ایک جتنے ہی مہنگے قرار پائے۔فہرست میں شامل دنیا کے 10 مہنگے ترین شہروں میں سنگاپور،

پیرس اور ہانگ کانگ کو پہلا نمبر ہی دیا گیا ہے اسی طرح اس بار فہرست میں ساتویں نمبر پر بھی 3 شہروں کو رکھا گیا ہے اور فہرست میں نواں، آٹھواں اور چھٹا نمبر دیا ہی نہیں گیا۔حیران کن طور پر فہرست میں اس بار دوسرا اور تیسرا نمبر بھی شامل ہی نہیں کیا اور پہلے نمبر پر تین شہروں کو شامل کیا گیا ہے۔ فہرست کے مطابق دنیا کا سستا ترین شہر وینزویلا کا شہر کارلاکاس ہے۔دنیا کے مہنگے ترین 10 شہروں میں 2 امریکی اور 2 سوئٹزرلینڈ کے شہر شامل ہیں۔اسی طرح دنیا کے سستے ترین شہروں میں بھارت کے تین شہر نئی دہلی، چنائے اور بنگلورے شامل ہیں ، پاکستان کا واحد شہر کراچی شامل ہے۔حیران کن طور پر لندن دبئی، واشنگٹن اور ابو ظہبی دنیا کے 10 مہنگے ترین شہروں میں شامل نہیں ہوتے۔جاپان کا دارالحکومت ٹوکیو اور چین کا دارالحکومت بیجنگ بھی دنیا کے مہنگے ترین شہروں میں شامل نہیں ہوتے تاہم ان ممالک کا ایک ایک شہر دنیا کے مہنگے ترین شہروں میں شامل ہے۔دنیا کے 10 مہنگے ترین شہروں میں لاس اینجلس ( امریکا)، تل ابیب( اسرائیل) نیو یارک( امریکا)، کوپن ہیگن( ڈنمارک)،سیول( جنوبی کوریا)، اوساکا ( جاپان)، جنیوا( سوئٹزرلینڈ)، زیورچ(سوئٹزرلینڈ)، ہانگ کانگ(چین)، پیرس( فرانس)، سنگاپور( سنگاپور) شامل ہیں ۔