ڈبلن (مانیٹرنگ ڈیسک) فلسطین کے مقبوضہ مغربی کنارے میں اسرائیل کے غیر قانونی کارخانوں میں تیار کی جانے والی مصنوعات کے بائیکاٹ کا بل آئرلینڈ کی سینٹ نیمنظور کر لیا ہے۔ ایک نجی ٹی وی چینل کی رپورٹ کے مطابق اسرائیلی مصنوعات پر پابندی کے بل پر آئرلینڈ کی پارلیمنٹ نے رواں سال جنوری میں رائے شماری کا فیصلہ کیا تھا لیکن آئرش حکومت اور پارلیمنٹ کے درمیان ایک معاہدہ ہوا کہ جس کی رو سے حکومت نے بل کی منظوری سے قبل
اسرائیلی ریاست پر دباؤ ڈالنے کا یقین دلایا تھا، تاہم غرب اردن میں یہودی کالونیوں کے کارخانوں میں تیار ہونے والی مصنوعات کی روک تھام کے حوالے سے آئرش حکومت کوئی موثر اقدام نہیں کر سکی۔ رپورٹ کے مطابق مصنوعات کے بائیکاٹ پر اسرائیلی وزیراعظم بینجمن نیتن یاہو نے الزام عائد کرتے ہوئے کہا کہ آئرلینڈ کی پارلیمنٹ کے آزاد ارکان نے بائیکاٹ کی عالمی تحریک بی ڈی ایس سے متاثر ہو کر اسرائیلی مصنوعات کے بائیکاٹ کا بل پیش کیا ہے۔
