فلوریڈا (انٹرنیشنل ڈیسک)امریکی ریاست فلوریڈا کے دلدلی علاقے اپنے مگر مچھوں کی وجہ سے شہرت رکھتے ہیں۔ اب اس دلدل کے ماحولیاتی نظام کو ایک انتہائی بڑی رینگنے والی مخلوق سے شدید خطرات لاحق ہو گئے ہیں۔فلوریڈا کے گھاس والے یا گیاہی دلدلی علاقوں میں مگرمچھوں کے ساتھ ساتھ انتہائی بڑی جسامت کے اژدہا پھیلتے جا رہے ہیں۔ اژدہاؤں کی یہ قسم بنیادی طور پر جنوبی اور
جنوب مشرقی ایشیا سے تعلق رکھتی ہے۔ 1970 کی دہائی میں اس اژدہا کو اس دلدلی علاقے میں پہلی مرتبہ دیکھا گیا تھا۔ایسا خیال کیا گیا ہے کہ جانوروں کے کسی غیر ذمہ دار شوقین شخص نے ان اژدہاؤں کے ایک جوڑے کو اس دلدلی علاقے میں چھوڑ دیا تھا۔ اْس کے بعد اِن کی تعداد میں مسلسل اضافہ دیکھا جا رہا ہے۔ محتاط اندازوں کے مطابق اس وقت فلوریڈا کے دلدلی علاقے میں برمی اژدہاؤں کی تعداد ڈیڑھ لاکھ سے تجاوہز کر چکی ہے۔اس کی تعداد کے بڑھنے کی وجہ اس علاقے میں پائے جانے والی دوسری جنگلی حیات بھی ہے۔ ان میں لومڑی، دلدلی خرگرش، پرندے، پشم دار راکون یا خرسک وغیرہ خاص طور پر شامل ہیں۔ برمی اڑدہا ایک بڑے جثے کا سانپ ہے اور اس کی لمبائی سات میٹر یا تیئیس فٹ تک ہوتی ہے اس کا وزن ایک سو تیرہ کلوگرام یااڑھائی سو پاؤنڈ تک ہوتا ہے۔اس کی افزائش کی بنیادی وجہ گھاس والی دلدل میں موجود دفاع سے محروم یہی جانور ہیں اور اِس باعث اژدہاؤں کی نسل بھی بہت تیزی سے پھیلتی جا رہی ہے جو مجموعی ایکوسسٹم کو خراب کر رہی ہے۔ جنوبی فلوریڈا کے دلدلی علاقے کی جنگلی حیات اور واٹر منیجمنٹ شعبے SFWMD سے تعلق رکھنے والے ریسرچر مائیکل کرک لینڈ کا کہنا ہے کہ گیاہی دلدلی علاقے میں پوستینی جانوروں کی تعداد میں ننانوے فیصد کمی واقع ہو گئی ہے۔
